काठमाडौँ । सत्ता साझेदार नेपाली कांग्रेसले आउँदो माघ ११ गते हुने राष्ट्रियसभा सदस्य निर्वाचनका लागि दल दर्ता गर्ने निर्णय गरेको छ । आज (शुक्रबार) बसेको सो पार्टीका केन्द्रीय कार्यसम्पादन समितिको बैठकले निर्वाचन आयोगमा दल दर्ताका गर्न कांग्रेस केन्द्रीय कार्यालयका मुख्यसचिव कृष्ण पौडेललाई जिम्मेवारी दिएको हो ।
त्यस्तै बैठकले राष्ट्रियसभा सदस्य निर्वाचनका लागि टिकट वितरण गर्न सभापति शेरबहादुर देउवालाई अधिकार प्रत्यायोजन गरेको छ । निर्वाचन आयोगको निर्वाचन कार्यतालिकाअनुसार राष्ट्रियसभा निर्वाचनका लागि दल दर्ता गर्ने अन्तिम समय मंसिर २९ अर्थात आजसम्मलाई तोकेको छ ।
आजकै बैठकले आउँदो पुस १६ देखि १९ गतेसम्म हुने भनिएको पार्टीको महासमिति बैठकलाई फागुनसम्म धकेल्ने निर्णय गरेकाे छ । महासमिति बैठक फागुन ७ गतेदेखि १० गते सम्म हुने निर्णय कांग्रेसले गरेको हो ।
