इजरायल र हमासबीच एक साता लामो युद्धविरामपछि फेरि युद्ध सुरु भएको छ ।
टाइम्स अफ इजरायलका अनुसार इजरायली सेनाले गाजामा बमबारी सुरु गरेको छ । इजरायलको होलित क्षेत्रमा रकेट अलर्ट जारी गरिएको छ । आइडीएफले हमासमाथि युद्धविराम उल्लंघन गरेको आरोप लगाएको छ । इजरायली सेनाले गाजामा हमासलाई हटाउनका लागि कारबाही पुनः सुरु गरिरहेको बताएको छ ।
युद्धविरामको अन्तिम दिनमा ८ जना इजरायली बन्धकलाई मुक्त गरिएको थियो। तीमध्ये दुई महिलालाई बिहीबार दिउँसो रिहा गरिएको थियो । ६ जना बन्धकलाई साँझ रिहा गरिएको थियो । बदलामा इजरायलले ३० प्यालेस्टिनीलाई रिहा गरेको थियो । जसमा २२ बालबालिका र ८ महिला रहेका छन् ।
सात दिनको युद्धविराममा हमासले ८० इजरायली, २४ विदेशी बन्धकलाई रिहा गरेको थियो भने यसको बदलामा इजरायलले २४० प्यालेस्टाइनीलाई रिहा गरेको थियो ।
यस युद्धविराममा अहिलेसम्म बेपत्ता रहेका नेपाली विद्यार्थी विपिन जोशीको अवस्थाको बारेमा भने स्पष्ट जानकारी अहिलेसम्म आउन सकेको छैन ।
