काठमाडौं । उद्योगी, व्यवसायीहरुले आफूहरुलाई नेपाल विद्युत प्राधिकरणले अनावश्यक दुःख दिएको आरोप लगाएका छन् । बक्यौता रकम नतिरेको भन्दै प्राधिकरणले डेडिकेटेड र ट्रंकलाइन फिडर मार्फत विद्युत उपभोग गर्ने उद्योगको लाईन काटेपछि उनीहरुले पत्रकार सम्मेलन गर्दै उनीहरुले यस्तो बताएका हुन् । उनीहरुले कुनै पनि हालतमा प्राधिकरणले दाबी गरेको विद्युत महशुल नतिर्ने अडान लिएका छन् ।
प्राधिकरणले ६१ वटा कम्पनीले २२ अर्बभन्दा बढि बक्यौता तिर्न बाँकी रहेको बताउँदै आएको छ । आफूहरुले तिर्नुपर्ने कुनै पनि बक्यौता नरहेको ब्यवसायीहरुको दाबी छ ।
उद्योगीहरुले आफूहरुले डेडिकेटेड र ट्रंकलाइनको सुविधा नै प्रयोग नगरेको र प्राधिकरणसँग प्रमाण भए ल्याउन आग्रह गरेका छन् । आइतबार डेडिकेटेड र ट्रंकलाइन लाइनका विषयमा जानकारी दिन व्यवसायीहरूले आयोजना गरेको पत्रकार सम्मेलनमा उनीहरुले आफूहरुले डेडिकेटेड र ट्रंकलाइनको सुविधा नलिएको दाबी गरेका हुन् ।
पत्रकार सम्मेलनमा नेपाल उद्योग वाणिज्य महासंघका पूर्वअध्यक्ष पशुपति मुरारकाले आफूहरूले विद्युत् प्राधिकरणले दिएको डेडिकेटेड र ट्रंकलाइनको सुविधा नै प्रयोग नगरेको दाबी गरे । उनले प्राधिकरणले प्रमाण दिए सबै उद्योगहरू पैसा तिर्न तयार रहेको बताए । उनले चार वर्ष अघिको बिल अहिले आएर पेस गरेर पैसा उठाउने काम बन्द गर्न आग्रह गरे ।
नेपाल उद्योग परिसंघमा अध्यक्ष राजेश अग्रवालले प्रमाण देउ, तिर्छौं भन्दा पनि प्राधिकरणले जबरजस्ती लाईन काटेको बताए । प्राधिकरणका निर्देशक कूलमान घिसिङले आफू पपुलर बन्नका लागि लाईन काटेको आरोप लगाए ।
महासंघका वरिष्ठ उपाध्यक्ष अञ्जन श्रेष्ठले विद्युत् प्राधिकरणका कार्यकारी निर्देशक कुलमान घिसिङले पत्रकार सम्मेलन गरेर व्यवसायीहरुलाई दोषी देखाउने गरी भावनात्मक रूपमा प्रस्तुत भएको बताए ।
व्यवसायीहरुले प्राधिकरणसँगको विवाद समाधान गर्न उच्चस्तरीय समिति बनाउनु पर्ने आवश्यकता औंल्याएका छन् । आयोग गठन गरेर आयोगले दिएको सुझावअनुसार अगाडि बढ्नुपर्ने उनीहरुको माग छ ।
