काठमाडौं । नेपाली कांग्रेसका महामन्त्री गगन थापाले नयाँ स्टक एक्सचेन्जको अनुमति दिने प्रक्रिया अघि नबढाउन सरकारलाई आग्रह गरेका छन् ।
शनिबार सामाजिक संजालमार्फत महामन्त्री थापाले कुनै बेला सरकार आफैंले रोकेको स्टक एक्सचेन्जको अनुमति बाँड्ने निर्णय पुनः अर्को अध्ययन नगरी अगाडि बढाउन लागेको भन्दै आपत्ति जनाएका हुन् ।
उनले भनेका छन्,‘सरकारले उपयुक्त अध्ययन बिना दीर्घकालीन महत्वका निर्णय लिनु भनेको पनि कुशासन हो। यस्तै भएको छ, नयाँ स्टक एक्सचेन्जको अनुमति दिने प्रक्रियामा ! कुनै बेला सरकार आफैंले रोकेको स्टक एक्सचेन्जको अनुमति बाँड्ने निर्णय पुनः अर्को अध्ययन नगरी अगाडि बढाउन लागेको खबरहरू आएका छन् । पुँजी बजारको अवस्था र आवश्यकता बारे थप अध्ययन भएर आवश्यकता पहिचान नभएसम्म यो अनुमति दिने प्रक्रिया रोकिनुपर्छ। सरकारले कुरा सुशासनका गर्ने, काम कुशासनका गर्ने गर्न मिल्दैन।’
महामन्त्री थापाले अध्ययन नगरी यसबाट आफूलाई अर्को काण्ड आउँछ कि भन्न डर लागेको बताए । उनले प्रधानमन्त्रीलाई यसलाई अघि नबढाउन आग्रह गरेका छन् । उनले भने, ‘हामीले यो कुरा प्रधानमन्त्रीज्यूलाई भेटेरै भनेका छौं र सार्वजनिक रूपमा पनि खबरदारी गराउन चाहन्छौँ।’
