झापा । झापाको भद्रपुरस्थित चन्द्रगढी विमानस्थलको धावनमार्गमा स्याल देखिएपछि बुद्ध एयरको जहाजले ओभरसुट गर्नु परेको छ । काठमाडौंबाट उडेको बुद्ध एयरको जहाज सोमबार साँझ ६ बजेर ५० मिनेटमा भद्रपुर आइपुगेको थियो ।
जहाज विमानस्थलमा अवतरण गर्न लाग्दा धावनमार्गमा स्याल देखिएसँगै टावरले जहाजलाई अवतरण नगर्न अनुरोध गरेको विमानस्थलका प्रमुख इन्दुराम अधिकारीले जानकारी दिएका छन् ।
विमानस्थलका कर्मचारीले तत्काल साइन जडित साधन लिएर स्याललाई धावनमार्गबाट खेदाएका थिए। त्यसपछि ओभरसुट भएको जहाजले आकाशमा एक फन्को लगाएर ७ बजेर ५ मिनेटमा सुरक्षित अवतरण गरेको थियो ।
ओभरसुटका कारण जहाज १५ मिनेट ढिला अवतरण भएको बताइएको छ । सो जहाज पछि ७ बजेर ३८ मिनेटमा यात्रु बोकेर काठमाडौँका लागि उडेको थियो । यो विमानस्थलमा अवतरण गर्न लागेका जहाजहरूसँग रनवेमा चराचुरुंगीसँग ठोक्किएका घटनाहरू घटिरहेका छन् ।
