काठमाडौँ । भारतले श्रीलंकामाथि फराकिलो जित हासिल गर्दै जारी क्रिकेट विश्वकपमा सेमिफाइनलमा आफ्नो स्थान सुरक्षित गरेको छ । विहिबार सम्पन्न खेलमा श्रीलंकालाई ३०२ रनको फराकिलो अन्तरले पराजित गर्दै भारत विश्वकपको सेमिफाइनलमा पुगेको हो ।
भारतले दिएको ३५८ रनको लक्ष्य पछाएको श्रीलंका १९.४ ओभरमा अल आउट हुदै ५५ रन मात्र बनाएको थियो ।
श्रीलंकाको ब्याटिंग ध्वस्त गर्नेक्रममा भारतीय बलर मोहमद शामीले सर्बाधिक ५ विकेट लिएका थिए । शामीले ५ ओभरमा एक मेडनसहित १८ रन दिएर ५ विकेट लिएका थिए । त्यस्तै मोहमद सिराजले ३ विकेट लिए भने जसप्रित बुमराह र रविन्द्र जडेजाले एक एक विकेट लिएका थिए ।
यसअघि टस हारेर पहिला ब्याटिंग गरेको भारतले ५० ओभरमा ८ विकेट गुमाउदै ३५७ रन बनाएको थियो ।
यस विश्वकपमा यो भारतको लगातार सातौं जित हो । ७ खेलमा १४ अंक भएको भारत सेमिफाइनलमा पुग्ने पहिलो टिम बनेको छ ।
यो हारसंगै श्रीलंका सेमिफाइनल दौडबाट बाहिरिएको छ । श्रीलंकाको यो पाँचौं हार हो । ७ खेलमा केवल २ जित हासिल गरेको श्रीलंका ४ अंकसहित सातौं स्थानमा रहेको छ ।
