इस्लामावाद । युक्रेनले पाकिस्तानसँग थप हतियारको माग गरेको छ । रुससँग युद्ध लडिरहेको युक्रेनले पाकिस्तानी हतियार माग गरेको हो । युक्रेनले पाकिस्तानसँग रक्षा उपकरण एवम् गोलीगठ्ठाको माग गरेको भारतीय समाचार संस्था इकोनोमिक टाइम्सले जनाएको छ ।
युक्रेनी रक्षामन्त्री रुस्तेम उमेरोभले पाकिस्तानी समकक्षीलाई टेलिफोन सम्पर्क गरी हातहतियार मागेका हुन् । उनीहरुबीच गत साता टेलिफोन संवाद भएको जनाइएको छ ।
कामचलाउ पाकिस्तानी सरकारका रक्षामन्त्री अवकाशप्राप्त लेफ्टिनेन्ट जनरल अनवर अली हैदरसँगको संवादमा आफूले युक्रेनी क्षमता विकास गर्न पाकिस्तानले गर्दै आएको सहयोगप्रति आभार व्यक्त गरेको युक्रेनी रक्षामन्त्री उमेरोभले जनाएका छन् । उनले द्विपक्षीय सम्बन्धलाई थप विस्तरा गर्नसमेत आफूहरु तयार रहेको जनाएका छन् ।
उमेरोभले एक्स (साबिकको ट्विटर) मा लेखेका छन्, ‘पाकिस्तानका रक्षा एवम् रक्षा उत्पादनमन्त्री लेफ्टिनेन्ट जनरल (अवकाशप्राप्त) अनवर अली हैदरसँग कुरा भयो । युक्रेनको क्षमतामा पाकिस्तानी योगदानप्रति कृतज्ञ छु । द्विपक्षीय सम्बन्धलाई कायम राख्दै आपसी हितबारे छलफल गर्न पाउँदा खुशी छु ।’
