काठमाडौं । प्रधानमन्त्री पुष्पकमल दाहाल प्रचण्ड जलवायु परिवर्तन सम्बन्धि अन्तरास्ट्रिय सम्मेलन (कोप २८) सम्मेलनमा सहभागी हुन दुबई प्रस्थान गरेका छन् ।
प्रधानमन्त्री प्रचण्ड नेतृत्वको टोली बुधबार राति ९ बजे त्रिभुवन अन्तर्राष्ट्रिय विमानस्थलबाट दुबई प्रस्थान गरेको हो । प्रधानमन्त्रीलाई बिदाइ गर्न सभामुख देवेन्द्रराज घिमिरे, कार्यवाहक प्रधानमन्त्री पूर्णबहादुर खड्कालगायत विमानस्थल पुगेका थिए ।
परराष्ट्र मन्त्रालयका अनुसार प्रधानमन्त्रीसँगै वन तथा वातावरण मन्त्री वीरेन्द्र महतो सहभागी छन् । त्यस्तै, प्रधानमन्त्रीपुत्री गंगा दाहाल, राष्ट्रिय योजना आयोगका सदस्य प्रभु बुढाथोकी, अर्थ मन्त्रालयका सचिव कृष्णहरि पुष्कर, प्रधानमन्त्री कार्यालयका सचिव एकनारायण अर्याल, वन मन्त्रालयका सचिव दीपककुमार खरेल सहभागी छन् ।
टोलीमा परराष्ट्र मन्त्रालयको सहसचिव सेवा लम्साल, प्रधानमन्त्रीका स्वकीय सचिव रमेश मल्ल, शिष्टाचार महापाल दीलिपकुमार पौडेल, प्रवीण भट्टराई, प्रधानमन्त्रीका वातावरण सल्लाहकार डा. पपुलर जेन्टल पनि भ्रमण दलमा छन् ।
