इस्लामावाद । पाकिस्तानले मुलुकमा रहेका ११ लाख अफगान शरणार्थीलाई स्वदेश फर्काउने तयारी गरेको छ ।
पाकिस्तानबाट प्रकाशित हुने ट्रिब्युन अखबारका अनुसार अवैध रुपमा पाकिस्तानमा बसोबास गरिरहेका अफगान शरणार्थीलाई स्वदेश फर्काउने तयारी अन्तिम चरणमा पुगेको छ । पछिल्लो समय दुई मुलुकबीच तनाव बढ्दै जाँदा पाकिस्तानले अफगान शरणार्थीलाई स्वदेश फर्काउन लागेको हो ।
पाकिस्तानको अन्तरिम सरकारले अफगान शरणार्थीलाई स्वदेश फर्काउने निर्णय गरिसकेको र यसबारे अधिकारीहरुलाई निर्देशनसमेत दिइसकेको ट्रिब्युनले जनाएको छ ।
स्रोतलाई उद्धृत गर्दै ट्रिब्युनले जनाएअनुसार सन् २०२१ को अगस्ट महिनामा तालिबानले सत्ता कब्जा गरेयता पाकिस्तानमा ४ लाख अफगानहरु अवैध रुपमा पाकिस्तान आएका छन् । त्यसअघि पाकिस्तानमा ७ लाख अफगानहरु अवैध रुपमा बसोबास गर्दै आएको अनुमान छ ।
