काठमाडौँ । नेपालले इजरायलमाथि हमासले गरेको आक्रमणको निन्दा गरेको छ । परराष्ट्र मन्त्रालयले शनिबार साँझ विज्ञप्ति जारी गरी इजरायली भूमिमा आतंकवादी आक्रमण भएको भन्दै निन्दा गरेको हो ।
मन्त्रालयले आक्रमणमा केही व्यक्ति हताहती भएका र केही घाइते भएका भन्दै नेपाल सरकार इजरायलको साथमा रहेको विज्ञप्तिमा उल्लेख छ ।
विज्ञप्तिमा भनिएको छ, ‘नेपाल सरकार इजरायलमा आज भएको आतंकवादी हमलाको घोर भत्सर्ना गर्दछ जसले बहुमूल्य मानवीय ज्यान गुमाउनुका साथै धेरै घाइते भएका थिए । यस महत्वपूर्ण घडीमा, हामी इजरायल सरकारसँग हाम्रो ऐक्यबद्धता व्यक्त गर्दछौं । नेपाल सरकार इजरायलका जनता र सरकारका साथै यस निर्मम हमलाका पीडितहरू र उनीहरूका परिवारहरूप्रति हार्दिक समवेदना र गहिरो समवेदना प्रकट गर्दछ। घाइतेहरुको शिघ्र स्वास्थ्य लाभको कामना गर्दछौं।’
मन्त्रालयले १४ जना नेपाली काम गरिरहेको फार्ममा पनि आक्रमण भएको जानकारी आएको र नौ जना नेपाली घाइते भएको र दुई जनाको अवस्था गम्भीर रहेको जानकारी दिएको छ । इजरायलस्थित नेपाली दूतावासले आक्रमण प्रभावित क्षेत्रमा बसोबास गर्ने नेपालीहरूसँग निकट सम्पर्कमा रहेको जनाएको छ ।
नेपालीको सुरक्षा, सुरक्षा र उद्धारका साथै घाइतेको उपचारका लागि पनि दूतावासले इजरायली अधिकारीसँग सम्पर्क र समन्वय गरिरहेको जनाएको छ । दूतावासले स्थितिलाई ध्यानमा राख्दै इजरायलमा रहेका नेपाली नागरिकहरूलाई सतर्क रहन र अधिकारीहरूले सुझाव दिएको सुरक्षा उपायहरू पालना गर्न अनुरोध गरेको छ ।
