काठमाडौं । दशैं बिदामा पनि अध्यागमन विभागको सेवा खुला रहने भएको छ । विभागले सोमबार सूचना जारी गर्दै टिकाको दिन (विजया दशमी) बाहेक दशैं तिहारको छुट्टीको समयमा पनि विभागको पर्यटक भिसा शाखा र एजेन्सी शाखा खुल्ला रहने जानकारी दिएको हो ।
विभागका अनुसार दशैं तिहारको बिदाका दिनहरूमा बिहान ११ बजेदेखि दिउँसो १ बजेसम्म दैनिक दुई घण्टा मात्र सेवा प्रवाह हुने छ । यस्तै कात्तिक २६ गतेदेखि ३० गतेसम्म चल्ने दीपावलीको अवसरमा समेत विभागले २९ गते भाइ टिकाको दिन पूर्ण रूपमा सेवा बन्द हुने र बाँकी बिदाका दिन सोही ११ बजेदेखि १ बजेसम्म २ घण्टा सेवा खुल्ला रहने जनाएको छ ।
