गाजा । चरमपन्थी संगठन हमासले इजरायलले गाजामा गरेको हवाई हमलामा हालसम्म ५० बन्धक मारिएको जनाएको छ । हमासको सैन्य शाखाका प्रवक्ताले यो जानकारी दिएका हुन् ।
अक्टोबर ७ मा हमासले इजरायलमा आक्रमण गरी सयौँ मानिसको हत्या गरेपछि धेरैलाई बन्धक बनाएर गाजामा ल्याएको थियो । इजरायली सेनाको पछिल्लो जानकारी अनुसार हमासले २२४ जनालाई बन्धक बनाएको छ । हमासको सैन्य शाखाका प्रवक्ता अबु ओबेदाले भने यस सम्बन्धमा विस्तृत जानकारी दिएका छैनन्।
यता गाजाको स्वास्थ्य मन्त्रालयले अक्टोबर ७ यता मृत्यु हुनेको सङ्ख्या २ हजार ९ सय बालबालिकासहित ७ हजार नाघेको जनाएको छ । अक्टोबर ७ मा इजरायलमा हमासले गरेको आक्रमणमा १४०० जनाको मृत्यु भएको थियो ।
