जेरुसलेम । प्यालेस्टाइनी लडाकुहरुले इजरायलमाथि भीषण आक्रमण सुरु गरेका छन् । शनिबारबाट हमास, प्यालेस्टाइन इस्लामिक जिहाद लगायतका प्यालेस्टाइनी लडाकु समूहले गाजापट्टीबाट इजरायलमाथि आक्रमण सुरु गरेका हुन् । ऐतिहासिक रुपमा विभिन्न धार्मिक एवम् राजनीतिक द्वन्द्वको चपेटामा पर्दै आएको सो क्षेत्रमा प्यालेस्टाइनी लडाकुहरुले क्षेप्यास्त्रसँगै स्थल आक्रमण गरिरहेको अन्तर्राष्ट्रिय सञ्चार माध्यमले जनाएका छन् ।
शनिबार सबेरै प्यालेस्टाइनी लडाकुले इजरायलतर्फ रकेट आक्रमण गरेका थिए । रकेट आक्रमणसँगै उनीहरुले स्थल कारवाही थालेका थिए । हाल प्यालेस्टाइनी लडाकुले स्देरोत, कफ्र अजा, ओफाकिम, नहल ओजजस्ता केही सीमावर्ती सहरमा प्रवेश गरी गोली चलाइरहेको जनाइएको छ । हालसम्म कति लडाकु इजरायली भूमिमा प्रवेश गरेका छन् भन्ने स्पष्ट भइसकेको छैन । इजरायली प्रहरीलाई उद्धृत गर्दै रोयटर्सले जनाएअनुसार दक्षिणी इजरायलका २१ स्थानमा दोहोरो गोली हानाहानका घटना भएका छन् ।
पछिल्लो आक्रमण दुई दशकअघिको दोस्रो प्यालेस्टाइनी विद्रोह इन्तेफादायताकै सबैभन्दा भीषण हो । हालसम्म हताहतीको यकिन विवरण सार्वजनिक नभएपनि २२ जना इजरायलीको मृत्यु भएको र अरु ५४५ जना घाइते भएको त्यहाँको एम्बुलेन्स सेवालाई उद्धृत गर्दै अन्तर्राष्ट्रिय समचार संस्था रोयटर्सले जनाएको छ । यद्यपि मृतकको सङ्ख्या अझै धेरै रहेको बताइएको छ ।
हामासजस्तै गाजा पट्टीमा सक्रिय लडाकु समूह अर्को लडाकु समूह प्यालेस्टाइनी इस्लामिक जिहादले पनि आफूहरु यस आक्रमणमा सहभागी रहेको जनाएको छ । यस समूहले केही इजरायली नागरिक एवम् सैनिकलाई बन्धक बनाएको भिडियोसमेत सार्वजनिक गरेको रोयटर्सले उल्लेख गरेको छ ।
इजरायलमाथि आक्रमण भएसँगै त्यहाँका प्रधानमन्त्री बेन्जामिन नेतान्याहूले आफ्नो मुलुक हाल युद्धको अवस्थामा रहेको घोषणा गरेका छन् । इरानसमर्थित लडाकुले आफ्नो मुलुकमाथि आक्रमण गरेको भन्दै उनले यसको बदला लिइछाड्ने दृढता व्यक्त गरेका छन् । आक्रमणको बदलामा इजरायली रक्षा फौजले गाजा क्षेत्रमा व्यापक हवाई आक्रमण गरेको छ ।
