थाइल्याण्डले बन्दूक र बन्दूकको अनुकरण गरी बनाइने हतियारमाथि नियन्त्रण बढाउने अधिकारीहरूले बताएका छन् । बैङ्कककोे एक व्यापारिक केन्द्रमा भएको गोलीकाण्डमा दुई जनाको मृत्यु र अन्य पाँच जना घाइते भएपछि थाइल्याण्डले बन्दुक तथा अन्य हतियारमाथि नियन्त्रण बढाउने अधिकारीहरूले बताएका हुन् ।
थाइल्याण्डका उपप्रधानमन्त्री अनुटिन चार्नभिराकुलले अवैध हातहतियारमाथि कडा निगरानी गर्ने र बन्दूकको अनुकरण गरी बन्ने हतियार नियन्त्रणका लागि कडा नियमसहित हतियार राख्ने, बोक्ने र प्रयोगमा प्रतिबन्ध लगाउने उपायहरू सरकारले लागू गर्ने बताए ।
खाली बन्दूक, छर्रा बन्दूक र ‘एअरगन’हरू घातक हतियारहरूमा परिमार्जन गर्न सकिने भएकोले यस्ता हतियार राख्नका लागि प्रशासनको अनुमति पत्र आवश्यक पर्दछ । सुटिङ खेलका लागि दर्ता भएका बन्दुक सुटिङ शिविरमा मात्र राख्नुपर्ने र सुटिङ गतिविधिमा भाग लिनेलाई उमेरको प्रतिबन्ध लगाइने उनले बताए ।
