गण्डकी । ४४ औँ विश्व पर्यटन दिवसका अवसरमा ट्रेकिङ एजेन्सिज एसोसिएसन अफ नेपाल(टान) गण्डकीको आयोजनामा आज पोखराको फेवाताल किनारा मार्कीदेखि पुम्दीसम्म पदयात्रा गरिएको छ ।
पोखरा महानगरपालिका–२२ का पर्यटकीय गन्तव्य मार्की–सिम्ले–पात्ले–पुम्दीसम्म फेवाताललाई आधार बनाएर गन्तव्य पहिचान, प्रवर्द्धन एवं एक दिवसीय पदयात्रा कार्यक्रम गरिएको टान गण्डकीका अध्यक्ष धर्मराज पन्थीले बताए ।
पदयात्रापछि आयोजित कार्यक्रममा गण्डकी प्रदेशसभा सदस्य प्रकाश बरालले पोखरा र आसपासका पर्यटकीय गन्तव्यको प्रवर्द्धन र विकासका माध्यमबाट पर्यटकको बसाई लम्ब्याउन सकिने बताए । फेवातालको संरक्षण र उपयोगका लागि फेवाताल प्राधिकरण गठन गर्नुपर्नेमा उनको जोड रहेको छ ।
गण्डकी प्रदेश नीति तथा योजना आयोगका उपाध्यक्ष डा कृष्णचन्द्र देवकोटाले राउन्ड फेवा, भ्युु फेवाको अवधारणका साथ फेवाताल र आसपासका गन्तव्यलाई प्रवर्द्धन र विकास गर्न खोजिएको बताए । धेरै पदमार्ग हराउँदै गएका अवस्थामा नयाँ गन्तव्य र मार्गको पहिचान गर्नु आवश्यक रहेको उनको भनाइ छ ।
पोखरा पर्यटन परिषद्का अध्यक्ष पोमनारायण श्रेष्ठले पर्यटन क्षेत्रको विकासका लागि सम्बद्ध सबैको सहकार्य आवश्यक भएको बताए । विश्व पर्यटन दिवसलाई विभिन्न कार्यक्रमका साथ मनाउन लागिएको उनले बताए । कार्यक्रममा गण्डकी प्रदेशका उद्योग, पर्यटन, वन तथा वातावरण सचिव कुमानसिंह गुरुङले पोखरा र आसपासका पर्यटकीय गन्तव्यको प्रवर्द्धनलाई प्राथमिकतामा राखिएको बताए । पदयात्राका क्रममा प्लाष्टिकजन्य फोहरसमेत सङ्कलन गरिएको थियो ।
