काठमाडौँ । आईसीसी महिला टी–ट्वान्टी विश्वकप एसिया क्षेत्र छनोट अन्तर्गत नेपालले लगातार तेस्रो जित निकालेको छ ।
मलेसियाको बांगीमा आज भएको खेलमा भुटानलाई ३ विकेटले हराउँदै नेपालले अपराजित यात्रा कायम राखेको हो ।
भुटानले दिएको ४० रनको लक्ष्य नेपालले १३ ओभर २ बलमा ७ विकेटको क्षतिमा पूरा गर्याे । नेपालकी कप्तान रुविना क्षेत्रीले १२, कविता जोशीले ९ तथा सिता रानामगरले ८ रन बनाए ।
भुटानकी अन्जली घलेले ३ तथा छिरिङ जानगेम्बाले २ विकेट लिइन् । यस्तै, अन्जु गुरुङ र सोनमले एक–एक विकेट लिए ।
यसअघि टस हारेर पहिले ब्याटिङ गरेको भुटानले निर्धारित २० ओभरमा ८ विकेट गुमाएर ३९ रन बनाएको थियो । भुटानका लागि कप्तान डेचेन वांग्मोले सर्वाधिक २१ रन जोडिन् । अन्य खेलाडीले दोहोरो अंक जोड्न सकेनन् ।
नेपालकी पूजा महतोले ३ तथा कविता कुवँर, खुसी डंगोल र कप्तान रुबिना क्षेत्रीले एक–एक विकेट लिए ।
नेपालले आफ्नो पहिलो खेलमा मलेसिया र दोस्रो खेलमा बहराइनलाई हराएको थियो । नेपालले चौथो खेल सोमबार कतार र समूह चरणको अन्तिम खेल मंगलबार यूएईसँग खेल्ने छ ।
प्रतियोगितामा ११ राष्ट्रको सहभागीता रहेको छ । सहभागी ११ देशलाई दुई समूहमा विभाजन गरिएको छ ।
प्रतियोगितामा समूह ए मा नेपाल, बहरान, भुटान, मलेसिया, कतार र यूएई छन् । समूह बी मा चीन, हङकङ, थाईल्यान्ड, कुवेत र म्यानमार छन् ।
