भारतले क्यानेडियनहरूका लागि भिसा सेवा निलम्बन गरेको छ ।
खालिस्तानी हरदीप सिंह निज्जरको हत्यालाई लिएर भारत र क्यानडाबीच तनाव बढिरहेका बेला क्यानडामा रहेको भारतको भिसा आवेदन केन्द्रले यस्तो घोषणा गरेको हो ।
यसअघि मंगलबार क्यानडाले आफ्ना नागरिकहरूलाई भारतका केही भागहरूमा नजान एडभाइजरी जारी गरेको थियो । त्यसको जवाफमा बुधबार भारतले पनि यस्तै किसिमको एडभाइजरी जारी गरेको थियो । यसपछि क्यानडाले राति अबेर भारतको एडभाइजरीलाई अस्वीकार गरेको थियो ।
पछिल्लो समय क्यानडामा रहेका भारतीय कूटनीतिज्ञ र भारतीय समुदायको एक निश्चित वर्गलाई धम्की दिइने गरेको देखिएको बताइएको छ ।
एडभाइजरीका अनुसार क्यानडामा बिग्रँदै गएको सुरक्षा अवस्थालाई ध्यानमा राख्दै त्यहाँ उपस्थित भारतीय विद्यार्थीहरूलाई बढी सतर्क रहन भारतले सल्लाह दिएको छ ।
