काठमाडौँ । पूर्वप्रधानन्यायाधीश कल्याण श्रेष्ठले शान्ति प्रक्रियालाई टुङ्गोमा पुर्याउन अब कुनै पनि बहानामा ढिलाइ गर्न नहुने बताएका छन् ।
सोमबार काठमाडौँको नयाँ बानेश्वरमा आयोजित सङ्क्रमणकालीन न्यायसम्बन्धी सम्मेलनमा बोल्दै पूर्वप्रधानन्यायाधीश श्रेष्ठले विश्व मानचित्रमा द्वन्द्व पीडित देशबाट नेपाललाई शान्तिमय देशमा बदल्नुपर्ने उल्लेख गरे ।
कार्यक्रममा उनले विश्वमा शान्तिमय देशको रूपमा संसारको मानचित्रमा चिनिएको देश भएपनि विश्व मानचित्रमा द्वन्द्वपीडित राष्ट्रमा हामी चित्रित हुन पुगेको उल्लेख गरे ।
पूर्वप्रधानन्यायाधीश श्रेष्ठले सदनमा विचाराधीन सङ्क्रणकालीन न्यायसँग सम्बन्धित विधेयकमा भएका कमीकमजोरी सच्याउन सकिएमा शान्ति प्रक्रियाका बाँकी काम छिट्टै निष्कर्षमा पुग्ने बताए ।
“हामी दिगो शान्तिको बाटोमा छौँ, त्यसको आधार न्याय हो, न्यायलाई इन्कार गरे शान्ति सम्भव हुँदैन”, उनले भने, “कुनै पनि बहानामा सङ्क्रमणकालीन न्यायलाई निष्कर्षमा पु¥याउन विलम्ब गर्न हुँदैन ।”
सदनमा दर्ता भएको विधेयकलाई सर्वस्वीकार्य बनाउनुपर्नेमा जोड दिँदै उनले सङ्क्रणकालीन न्याय प्रक्रियालाई टुङ्गोमा पुर्याउन सबै पक्षले उदारता देखाउनुपर्ने बताए ।
सशस्त्र द्वन्द्वपछि लडाकुको सेनामा समायोजन र समाजमा पुनःस्थापना, नयाँ संविधान निर्माण भए पनि लामो समयसम्म न्यायनिरुपण हुन नसक्नु दुःखद् भएको उनले बताए ।
उनले वर्तमान सरकारकै पालामा शान्ति प्रक्रिया टुङ्गोमा पुग्ने विश्वाससमेत व्यक्त गरे । पीडितले लामो समयदेखि न्यायको प्रतीक्षा गरिरहेको उल्लेख गर्दै उनले दृढताका साथ लागे यसलाई पनि समाधान गर्न सकिने धारणा राखे ।
शान्ति प्रक्रियालाई टुङ्गोमा पुर्याउन पीडितले अन्याय सहनुपर्छ भन्न तर्कसँगै विमति राख्दै उनले न्यायका माध्यमबाट समाधान निकाल्नुपर्ने जनाए ।
