काठमाडौँ । नेकपा एमालेका अध्यक्ष केपी शर्मा ओलीले भारतले ८ वर्षअघि नेपालमाथि गरेको नाकाबन्दीका कठोर दिनहरूको स्मरण गरेका छन् ।
दोस्रो संविधानसभाबाट नयाँ संविधान निर्माण भइरहेको बेला भारतले गरेको नाकाबन्दीको ओलीले आज सामाजिक सञ्जालमार्फत स्मरण गरेका हुन् ।
ओलीले ‘इतिहासमा आज’ भन्दै ती कष्टकर दिनको सम्झना गरेका छन् । ‘आज असोज ६ गते । आज भन्दा ८ वर्ष अघिको आजको दिन सम्झन्छु । जीवनमा कतिपय दिन यस्ता हुन्छन्, तिनलाई कहिलै बिर्सिन सकिँदैन। अस्पतालमा अक्सिजन, औषधि, बजारमा पेट्रोल, डिजेल, मट्टितेल, खाना पकाउने ग्यास लगायतका दैनिक उपभोग्य वस्तुको हाहाकार थियो, इन्धन नभएर अस्पताल जान नपाउने, खाना पकाउन नपाउने, भोकै बस्नु पर्ने पीडा भोग्यौँ।’ ओलीले स्मरण गर्दै भनेका छन्, ‘देश भित्र र बाहिर बस्ने सबै नेपाली जनताले करिब ६ महिनासम्म भएको नाकाबन्दीलाई पराजित गरेका थियौँ ।’
संविधान निर्माणप्रति असन्तुष्ट भारतले गरेको नाकाबन्दीले सिंगो देश प्रभावित हुन पुगेको थियो । उनी गाडि सम्झन्छन्, ‘कुनै दिनले इतिहास सम्झाउँछ र इतिहासले देशलाई आत्मनिर्भर बनाउने प्रेरणा दिन्छ। जतिसुकै अवरोध भए पनि, जतिसुकै प्रहार भए पनि, जतिसुकै घेराबन्दी भए पनि देशलाई आत्मनिर्भर बनाउने अभियान छोड्नु हुँदैन।’
उनले सोधेका छन्, ‘तपाईंहरूले ती दिनलाई कसरी सम्झनु भएको छ ?’
