काठमाडौं । ललितानिवास प्रकरणमा पक्राउ परेका दुई जना रिहा भएका छन् । नेपाल प्रहरीको केन्द्रीय अनुसन्धान ब्यूरो (सीआईबी) ले यो प्रकरणमा पक्राउ परेकाहरूलाई थुनामा राख्न अनुमति माग्न बुधबार जिल्ला अदालतमा उपस्थित गराएकोमा दुई जनालाई थुनामा राख्न अनुमति नदिएको हो ।
अदालतले मालपोत कार्यालयका तत्कालीन प्रमुख धर्म गौतम र समरजंग कम्पनीका तत्कालीन प्रमुख लोकहरि घिमिरेलाई थुना बाहिरै राखेर अनुसन्धान गर्न आदेश दिएको हो । उनीहरूलाई उमेर र स्वास्थ्यका कारण थुनामुक्त गर्न अदालतले आदेश दिएको हो । यो प्रकरणमा पक्राउ परेका अन्यहरूलाई भने अदालतले थप पाँच दिन थुनामा राख्न अनुमति दिएको छ ।
यो प्रकणको अनुसन्धान गरिरहेको सीआईबीले अब अनुसन्धान अन्तिम चरणमा पुर्याएको छ । अनुसन्धान सकिएपछि जिल्ला सरकारी वकिल कार्यालयमा अनुसन्धान प्रतिवेदन बुझाउने छ ।
त्यसपछि सरकारी वकिल कार्यालयले मुद्दा अभियोजन गर्ने छ । सर्वाेच्च अदालतले यो प्रकरणमा तत्कालीन प्रधानमन्त्रीहरुमाथि पनि अनुसन्धान गर्न आदेश दिएको छ । तर सीआईबीले हालसम्म तत्कालीन प्रधानमन्त्रीद्वय माधवकुमार नेपाल र बाबुराम भट्टराईसँग बयान लिएको छैन । तर तत्कालीन मुख्यसचिव लिलामणि पौड्यालसँग भने बयान लिएको छ ।
