काठमाडौं । संसद विकास कोषको रकम खर्च गर्न रोक लगाएर सर्वोच्च अदालतले संसदमाथि हस्तक्षेप गरेको भन्दै संसदमा कुरा उठेको छ ।
बिहीबारको प्रतिनिधिसभा बैठकमा नेपाली कांग्रेसका सांसद श्यामकुमार घिमिरेले संसद विकास कोषसम्बन्धी रिटको सुनुवाइका क्रममा सर्वोच्च अदालतले संसदको क्षेत्राधिकारमा हस्तक्षेप गरेको बताएका हुन् ।
उनले बजेट निर्माण र पारित गर्ने संंसदको अधिकार भन्दै त्यसमा न्यायालय प्रवेश गर्न नमिल्ने बताए । घिमिरेले सर्वोच्च अदालतको आदेश उचित नभएको बताए ।
उनले भने, ‘हाम्रो सविधानले शक्ति पृथकीकरणको गरेको छ । सबैको अलग–अलग दायरा र क्षेत्रको कुरा गरेको छ । हिजोको आदेशले एक अर्काको कार्यक्षेत्रमा प्रवेश गर्ने दखल अन्दाजी गर्ने प्रयासमा गएको छैन । सम्पूर्ण संरचना त्यता उन्मुख भएको आभास दिएको छ ।’
उनले आफू अदालतप्रति विश्वास गर्ने र यसको स्वतन्त्रका लागि लडेको भएपनि अदालतको हिजोको आदेश भने स्वभाविक नभएको बताए । उनले भने, ‘बजेटको एउटा अंश झिकेर खण्डित गर्ने कुरा कार्यपालिका र न्यायापालिकालाई छैन । यो हुन थाल्यो भने लोकतन्त्रको अवस्था के होला । यो व्याख्याले संविधानलाई खलल पार्ने काम भएको छ ।’
उनले कुरा पाँच करोडको नभएर नियतको भएको बताए ।
