काठमाडौं । राप्रपा अध्यक्ष तथा सांसद राजेन्द्र लिङ्देनले संसदलाई तीन दलले बन्धक बनाएको भन्दै आपत्ति जनाएका छन् ।
मंगलबार बसेको प्रतिनिधिसभा बैठकमा उनले कांग्रेस, एमाले र माओवादी केन्द्रले संसद र देशलाई नै बन्धक बनाएको भन्दै आपत्ति जनाएका हुन् ।
समावेशी संविधान बनाएको र सोहीअनुसार संसद पनि गठन भएको भन्दै उनले तर, तीन दलले निषेधको राजनीति गरेको आरोप लगाए ।
अध्यक्ष लिङ्देनले भने, ‘यो संसद् ३ दलको बन्धक बन्न मिल्छ ? तपाईहरु रातारात सल्लाह गर्ने, ३ दल मिलेपछि लुरुलुरु हामी पछि लाग्नुपर्ने ? म सभामुख महोदयको ध्यानाकर्षण गर्न चाहन्छु, यो गैरसंवैधानिक शक्ति केन्द्र संसदभित्र कसरी निर्माण भइरहेको छ ? नियमावलीको कुन धारा, उपधाराले, संविधानको कुन धारा उपधाराले यस्तो प्रकारको संरचनाको परिकल्पना गर्छ ? ३ दल बस्ने, ३ दलको नेता बस्ने । संसदीय समितिको निर्माण कसरी हुन्छ भन्ने कुरा नियमावलीमा छ, ३ दलले कस्तो बनाउने भनेर निर्णय गरेको कुरा बाहिर आइरहेको छ ।’
सहकारीपीडित संघर्षमा उत्रिएको जानकारी गराउँदै उनले उनीहरुलाई न्याय दिन सरकारले नसकेको बताए । देश र जनता विभिन्न समस्याबाट पीडित भइरहँदा प्रमुख तीन दलबीच भागबन्डामा भने सहमति हुने गरेको उनको भनाइ छ ।
प्रतिपक्षी दल मात्र होइन सरकार पनि संसद नचलोस् भन्नेमा रहेको अध्यक्ष लिङ्देनले बताए ।
