लमजुङ । लमजुङमा गत आर्थिक वर्षमा मात्रै १४ वटा जबरजस्ती करणी सम्बन्धी घटना भएको प्रहरीको तथ्यांकले देखाएको छ । जिल्ला प्रहरी कार्यालय लमजुङको तथ्यांक अनुसार गत आर्थिक वर्षमा जबरजस्ती करणी सम्बन्धी १४ वटा मुद्दा दर्ता भएका हुन् । सो बाहेक जिल्लामा चारवटा मुद्दा बाल यौन दुर्व्यवहार सम्बन्धी भएका छन् ।
जिल्ला प्रहरी कार्यालय लमजुङका अनुसार गत आर्थिक वर्षमा जिल्लामा भएका जबरजस्ती करणीका घटनामा अधिकांश पीडितहरू २० वर्ष भन्दा कम उमेर समुहका बालिकाहरू रहेका छन् ।
बढ्दो बेरोजगार, छाडा संस्कृती, मदिराजन्य वा उत्तेजक खानपिन, कुलत, यौन शिक्षाको कमी र नकारात्मक सोचको विकासले पनि बलात्कारको घटना हुने गरेको प्रहरी अनुसन्धानले देखाएको छ । पछिल्लो समय सामाजिक सञ्जालको दुरुपयोगले पनि बलात्कारका घटना हुने गरेको प्रहरीले जनाएको छ ।
जिल्लामा आर्थिक वर्ष २०७८–७९ को एक वर्षे अवधीमा २० वटा जबरजस्ती करणी र तीनवटा जबरजस्ती उद्योग सम्बन्धी घटना भएका थिए । त्यसभन्दा अघिल्लो आर्थिक वर्ष अर्थात आव २०७७–७८ मा जबरजस्ती सम्बन्धी १६ वटा र जजक उद्योग सम्बन्धी चारवटा मुद्दा परेको थियो ।
लमजुङ प्रहरीका अनुसार जिल्लामा आर्थिक वर्ष ०७६–७७ मा मात्रै १० वटा जबरजस्ती करणीका घटना दर्ता भएका थिए भने ९ वटा जबरजस्ती करणी उद्योगका मुद्धा दर्ता भएका थिए । सो भन्दा अघिल्लो आर्थिक वर्ष ०७५–७६ को एकवर्षको अवधीमा जिल्लामा १६ वटा जबरजस्ती करणीका घटना भएका थिए ।
लमजुङ प्रहरीको तथ्यांक अनुसार जिल्लामा आर्थिक वर्ष २०७४–७५ मा जबरजस्ती करणी सात र उद्योग अन्तर्गत पाँचवटा मुद्दा दर्ता भएका थिए । आर्थिक वर्ष २०७३–७४मा पनि जबरजस्ती करणी सात र उद्योग अन्तर्गत पाँचवटा मुद्दा दर्ता भएको प्रहरी तथ्यांक छ ।
यस्तै आर्थिक वर्ष ०७२–७३ मा जबरजस्ती करणीमा सात र उद्योग अन्तर्गत चार मुद्दा दर्ता भएका छन भने आर्थिक वर्ष ०७१–७२ मा जबरजस्ती करणीका पाँच र उद्योगमा चार घटना प्रहरीमा दर्ता भएका छन् ।
प्रहरीको तथ्यांक अनुसार पछिल्लो वर्षहरूमा जबरजस्ती करणीका घटना बढ्दो देखिए पनि गत आर्थिक वर्ष भने कम घटना भएको छ । जबरजस्ती करणी जघन्य अपराध हो । १६ वर्ष भन्दा कम उमेरका बालिकासँग सहमतिमै सबन्ध गरेको भएपनि जबरजस्ती अन्तर्गत पर्ने कानुनमा उल्लेख छ ।
