मस्को । रूसी राष्ट्रपति भ्लादिमिर पुटिनले युक्रेनलाई नेटोमा सामेल गर्दा विश्व थप असुरक्षित हुने बताएका छन् ।
पुटिनले भने, “मलाई विश्वास छ, यसले युक्रेनको सुरक्षालाई बढाउँदैन र समग्रमा विश्वलाई अझ बढी असुरक्षित बनाउनेछ साथै अन्तर्राष्ट्रिय क्षेत्रमा थप तनाव निम्त्याउनेछ ।”
राष्ट्रपति पुटिनले सन् २०२२ को फेब्रुअरी महिनामा युक्रेनलाई नेटो गठबन्धनमा सामेल हुनबाट रोक्न भन्दै सैन्य आक्रमण थालेका थिए ।
पुटिनले लिथुआनियामा भएको शिखर सम्मेलनका क्रममा नेटोले युक्रेनलाई समर्थन गर्ने प्रतिबद्धता जनाएको थियो । यद्यपि युक्रेनको सदस्यताका लागि भने नेटोले कुनै समयसीमा दिएको छैन ।
आक्रमणकारी रूसी सेनालाई पछाडि धकेल्न युक्रेनले क्षेप्यास्त्रलगायत थप उन्नत र लामो दूरीका हतियारको माग गर्दै आएको छ ।
पुटिनले यसको पनि निन्दा गरेका छन् । उनले भने, “नयाँ हतियारको वितरणले युक्रेनी पक्षका लागि स्थितिलाई अझ बिगार्नेछ र द्वन्द्वलाई बढावा दिनेछ ।”
