काठमाडौं । नेपाली कांग्रेसकी केन्द्रीय सदस्य डा. आरजु राणाले महामन्त्रीले प्रस्तुत गरेको प्रतिवेदन एनजीओको ‘विसलिस्ट’ जस्तो भएको टिप्पणी गरेकी छन् ।
बिहीबार पार्टीको जारी केन्द्रीय समिति बैठकमा राणाले महामन्त्रीको प्रतिवेदन राजनीतिक दस्तावेज भन्दापनि एनजीओको ‘विसलिस्ट’जस्तो भएको टिप्पणी गरेकी हुन् ।
उनले भनिन्,’महामन्त्रीको प्रतिवेदनमा कुनै राजनीतिक दस्तावेज आउँछ होला भन्ने सोचेको थिएँ । त्यो एक एनजीओको ‘विसलिस्ट’ जस्तो लाग्यो । कार्यक्रम धेरै गर्ने अनि त्यसको रिजल्टचाहिँ के त ?’
उनले पार्टीको घोषणापत्रसँग सरकारको नीति र नियमहरू मेल खाए नखाएको हेर्नुपर्ने र त्यहीअनुसार कार्यक्रम गर्नुपर्ने बताइन् । उनले भनिन्,’प्रशिक्षण सञ्चालन गर्नुपर्छ । प्रशिक्षणबाट पार्टी के हो, पार्टीमा किन लाग्ने भन्ने सबै बुझेपछि र प्रतिबद्ध भएपछि मात्रै क्रियाशील सदस्यता दिनुपर्छ ।’
उनले महिलाहरूका लागि निर्वाचन क्षेत्र छुट्याउनुपर्नेसमेत बताइन् । राणाले पार्टीबाट मन्त्री हुनेहरुले पूर्व तयारी गर्नुपर्ने बताइन् । उनले पार्टी सभापति शेरबहादुर देउवा प्रधानमन्त्री हुँदा यसबारे बुझ्न पाएको बताइन् ।
उनले भनिन्, ‘प्रधानमन्त्रीको धर्मपत्नी भएर मैले ४/५ पटक उहाँसँगै के–के हुन्छ, देखेको छु । हाम्रा मन्त्रीहरू मन्त्री भएर जानुहुन्छ, तर सिक्दा–सिक्दै ठीक्क हुन्छ । त्यसैले कुन मन्त्रालयको ड्युटी के हो ? के भइरहेको छ, के गर्नुपर्ने हो ? यसबारे हामीले पार्टीमै छलफल गरेर पूर्वतयार हुनु आवश्यक छ।’
