काठमाडौँ । राष्ट्रपति रामचन्द्र पौडेलको स्वास्थ्य अवस्था स्थिर रहेको अस्पतालले जनाएको छ ।
महाराजगञ्जस्थित त्रिवि शिक्षण अस्पताल मनमोहन कार्डियो थोरासिक भास्कुलर तथा ट्रान्सप्लान्ट सेन्टरले आज एक विज्ञप्ति जारी गरी राष्ट्रपति पौडेलको स्वास्थ्य अवस्था स्थिर रहेको जनाएको हो ।
विज्ञप्तिमा राष्ट्रपति पौडेलको मुटुको चाल मनिटरिङ गर्नका लागि अस्पताल भर्ना गरिएको बताइएको छ ।
राष्ट्रपति पौडेलको स्वास्थ्यमा समस्या देखिएपछि आज विहान ३ बजे अस्पताल भर्ना गरिएको थियो ।
यसअघि राष्ट्रपति पौडेल मुटुमा समस्या भएपछि गत मंगलबार शहीद गङ्गालाल हृदयरोग केन्द्रमा एन्जियोग्राम गरि बुधबार डिस्चार्ज भएका थिए ।
अस्पताल स्रोतका अनुसार पौडेलको मुटुको दाहिनेतर्फ एउटा नसा ७० प्रतिशत बन्द भएको पाइएको थियो । त्यसपछि एनजिओप्लास्टी गरेर रक्तनली खोलिएको थियो ।
