काठमाडौँ । नेपालको ललितकला क्षेत्रका अग्रज कलाकारहरूको कला प्रदर्शनी सुरु भएको छ ।
नेपाल ललितकला प्रज्ञा–प्रतिष्ठान (नाफा)को आयोजनामा अग्रज कलाकार शशि शाह, कृष्ण मानन्धर, स्व इन्द्र प्रधान र वत्सगोपाल वैद्य अर्थात् स्किव–७१ का चित्रकला प्रदर्शनी सुरु भएको हो । ‘अन्तरसम्बन्ध–२०८०’ नाम दिइएको उक्त प्रदर्शनी यही असार १२ गतेसम्म चल्नेछ ।
प्रदर्शनी अवलोकन गर्दै पूर्वप्रधानमन्त्री झलनाथ खनालले नेपाल कलाको एउटा खानीजस्तो रहेको र त्यसमा पनि ललितकलाका असङ्ख्य विधाहरू रहेको बताए । उनले केही समय अघि राष्ट्रिय ललितकला प्रदर्शनी आफूले अवलोकन गर्दा नेपाली कलाको सृजनशीलता निकै माथि पुगेको पाएको स्मरण गरे ।
अग्रज कलाकार कृष्ण मानन्धरले आफूहरूले बम्बईबाट अध्ययन गरेर फर्किएपश्चात् समूह बनाएर कला गतिविधि गर्ने र आर्ट ग्यालरी खोल्ने काम गरेको स्मरण गरे । उनले भने, ‘त्यस समय राम्रो आर्ट ग्यालरी थिएन । शशिविक्रम क्याम्पस प्रमुख हुनुहुन्थ्यो र उहाँले दिएको योगदान भुल्नु हुँदैन ।
कलाकार शशि शाहले सङ्गठनबाटै कलाको इतिहास बनाउनुपर्छ भनेर वत्सगोपाल वैद्य, कृष्ण मानन्धर, इन्द्र प्रधान र आफू एक ढिक्का भएर आएको बताए । नेपालको कलाक्षेत्र स्किव–७१ बाटै सङ्गठनात्मकरूपमा जानुपर्छ भन्दै उनले नयाँ पुस्तालाई सचेतसमेत गराए ।
प्रतिष्ठानका सदस्यसचिव देवेन्द्रकुमार काफ्लेले अग्रज कलाकारको सिर्जना प्रदर्शनीलाई निरन्तरता दिने बताए । उनले भने, ‘हामीले अग्रज र दिवङ्गत कलाकारको प्रदर्शनीको सुरुआत गरेका छौँ । आगामी दिनमा यस्ता कार्यलाई निरन्तरता दिन्छौँ ।’
प्रतिष्ठानका उपकुलपति लालकाजी लामाले प्रतिष्ठानले स्थापनाकालदेखि नै कलाको उत्थानका लागि विविध गतिविधि गर्दै आएको बताउँदै आफूहरूले अग्रजले देखाएको बाटो पहिल्याएको धारणा राखे ।
प्रतिष्ठानका कुलपति नारदमणि हार्तम्छालीले ललितकला पढ्दाका गुरुहरूले दिएको मार्गदर्शनकै शिक्षाले आफूले प्रतिष्ठानजस्तो संस्थाको जिम्मेवारी पाएको र विगतका विरासतसँग अग्रजको भूमिकालाई जोडेर अगाडि बढाउन जरुरी भएको धारणा राखे ।
