काठमाडौँ । सहिद स्मारक ए डिभिजन लिग फुटबल अन्तर्गत सिजनको आफ्नो अन्तिम खेलमा उपाधि विजेता चर्च ब्वाइज युनाईटेडले सहज जित निकालेको छ ।
शुक्रबार एन्फा कम्प्लेक्समा चर्च ब्वाइजले एफसी खुमलटारलाई २–० गोल अन्तरले पराजित गरेको हो । चर्च ब्वाइजसँग पराजित भएसँगै खुमलटार भने रेलिगेसनमा परेको छ । खुमलटार बढुवा भएकै सिजन ’बी’ डिभिजनमा घटुवा भएको छ । खेलको १३ औं मिनेटमा सुशील शाहले गोल गर्दै चर्च ब्वाइजलाई सुरुआती अग्रता दिलाएका थिए । पहिलो हाफको इन्जुरी समयमा जोसेप बेम्पाहले गोल गर्दै चर्च ब्वाइजलाई २–० को जित दिलाए । चर्च ब्वाइजले २६ खेलमा ४८ अंक जोडेर शीर्ष स्थानमा रह्यो । खुमलटार २६ खेलमा २७ अंक जोडेर पुछारमा रह्यो ।
त्यस्तै शुक्रबार नै त्रिपुरेश्वरस्थित दशरथ रंगशालामा फ्रेन्ड्सले एपीएफ क्लबलाई ४–० गोल अन्तरले पराजित गर्यो । फ्रेन्ड्सको जितमा टोरिक जेब्रिन, विकास थापा, राफिक अमिनु र अखरबेक उक्तामोभले एक एक गोल गरे ।यस जितसँगै फ्रेन्ड्सले २६ खेलमा ३० अंक जोडेको छ । एपीएफको २६ खेलमा ३० अंक रहेको छ ।
त्यस्तै शुक्रबार नै च्यासल मैदानमा पुलिसले सातदोबाटो युथ क्लबलाई १–० गोल पराजित गर्यो । पुलिसको जितमा अहमद हिजाजीले २१ औं मिनेटमा निर्णायक गोल गरे । पुलिसले २६ खेलमा ४१ अंक जोड्यो । पुलिसले तेस्रो स्थानमा रहदै लिगको अन्त्य गरेको छ । सातदोबाटोको २६ खेलमा ३५ अंक रहेको छ ।
