काठमाडौं । सुरुवाती अग्रता जोगाउन नसक्दा थ्री स्टार क्लब सहिद स्मारक ‘ए’ डिभिजन लिगमा एफसी खुमलटारसँग बराबरीमा रोकिएको छ ।
च्यासल रंगशालामा थ्री स्टार खुमलटारसँग २–२ गोलको बराबरीमा रोकिएको हो । थ्री स्टारका लाकेन लिम्बु र आदित्य शाक्यले गोल गरे । खुमलटारका मेसुके ओलोमोउ र स्टेफन समिर विनोङले गोल गरे ।
खेलको चौथो मिनेटमा नै लाकेन लिम्बुको गोलबाट थ्री स्टारले १–० को अग्रता लिन सफल भयो । अशोक खवासको क्रस डि बक्समा क्यिलर हुन नसक्दा आदित्य शाक्यको हेडर पासमा लाकेनले हेडमार्फत नै गोल गर्न सफल भए ।
पहिलो हाफको इन्ज्युरी समयको थप गरिएको तेस्रो मिनेटमा मेसुके ओलोमोउले फ्रिकिकमा सिधै गोल गर्दै खेललाई १–१ गोलको बराबरीमा ल्याए । अजायी मार्टिन्सले अनावश्यक फउल गरेपछि झन्डै ३० यार्डमा प्राप्त फ्रिकिकमा कुनै गल्ती गरेनन् ।
५०औं मिनेटमा स्टेफन समिरले गोल गर्दै खुमलटारले २–१ को अग्रता लिन सफल भयो । उनले दुई डिफेन्डरलाई बिट गर्दै गरेको प्रहार पहिलो बारको पोलमा लाग्दै गोलमा परिणत भयो ।
६८औं मिनेटमा आदित्य शाक्यले पेनाल्टीमा गोल गर्दै खेललाई २–२ गोलको बराबरीमा ल्याए । सन्नी व्यन्जनकारको प्रहारलाई खुमलटारका कप्तान रेजिन सुब्बाले ह्यान्ड गर्न पुगेपछि रेफ्रीले थ्री स्टारलाई पेनाल्टी प्रदान गर्दा आदित्य चुकेनन् ।
८०औं मिनेटमा विराज महर्जनको पेनाल्टी बक्सबाहिरको सशक्त प्रहार क्रसबारमा लागेर फर्कदा थ्री स्टार अग्रता लिनबाट चुक्यो ।
यस बराबरीसँगै थ्री स्टारले शीर्षस्थानको जावलाखेल युथ क्लबसँगको अंक दुरी बराबरी गर्ने अवसर गुमाएको छ । दोस्रो स्थानमा रहेको थ्री स्टारको १४ खखेलबाट २३ अंक पुगेको छ । जावलाखेलको १४ खेलबाट २४ अंक छ । खुमलटार १४ खखेलबाट १४ अंक जोडेर १३औं स्थानमा छ ।
एन्फा कम्प्लेक्सको मंगलबारै भएको खेलमा शीर्षस्थानको जावलाखेल नेपाल पुलिस क्लबसँग २–१ ले पराजित भएको छ । पुलिस १४ खेलबाट १५ अंक जोडेर १०औं स्थानमा उक्लिएको छ ।
