काठमाडौं । विभागीय टोली सशस्त्र प्रहरी बलको एपीएफ क्लब नेपाल पुलिस क्लबसँग पराजित भएको छ । मंगलबार ललितपुरको च्यासल मैदानमा भएको खेलमा पुलिसले एपीएफ क्लबलाई १–० गोल अन्तरले पराजित गरेको हो । जितसँगै पुलिस क्लब रेलिगेसन क्षेत्र छोडेको छ ।
१७ औँ चरणको खेलको समाप्ती हुँदासम्म पुलिस क्लब लिगको पुछारबाट दोस्रोमा थियो । तर, च्यासल मैदानमा विभागीय टोली एपीएफलाई हराएपछि भने पुलिस क्लब लिगको १०औँ स्थानमा उक्लिएको छ ।
पहिलो हाफ भने गोलरहित बराबरीमा सकिएको थियो । खेलको ६१औँ मिनेटमा मोइज टुमले गरेको गोल नै पुलिसका लागि निर्णायक बन्यो । बाँकी समयमा दुवै टोलीले केही राम्रा अवसर पाए पनि गोल भने गर्न सकेनन् ।
योसँगै पुलिस क्लब पहिलो लेगमा ब्यहारेको हारको बदला पनि लिन सफल भयो । यसअघि च्यासल मैदानमै भएको पहिलो लेगमा नेपाल पुलिस क्लब एपीएफ क्लबसँग २–० गोल अन्तरले पराजित भएको थियो ।
