बाँके । बाँकेको खजुरामा निर्माणाधीन ४ लेन सडक ३ पटक म्याद थप्दा पनि सम्पन्न हुन सकेको छैन । बाँकेको खजुरा बजारमा १ हजार ८०० मिटर लम्बाइको ४ लेन सडक २०७४ चैतमा गजुरमुखी कन्स्ट्रक्सन कम्पनी इलामले निर्माण थालेको थियो । सडक २०७७ चैतमा निर्माण सम्पन्न गर्नुपर्ने थियो तर हालसम्म ३ पटक म्याद थप भए पनि काम सन्तोषजनकरूपमा अघि बढ्न नसकेको सडक डिभिजन कार्यालय नेपालगन्जका डिभिजन प्रमुख इन्जिनीयर नीरज शाक्यले जानकारी दिए ।
‘सम्झौताअनुसार प्रतिदिन ० दशमलव ०५ प्रतिशतका दरले हर्जाना लगाएर काम शुरू भए पनि सन्तोषजनक रूपमा निर्माण कार्य अघि बढेको छैन,’ उनले भने । शुरूआतमा बिजुलीका पोल तथा खानेपानीको पाइप सार्ने, रुख तथा सडकखण्डमा पर्ने संरचना, कोभिड–१९ का कारण कामले गति लिन नसके पनि पछिल्लो समय भने निर्माण कम्पनीको लापरवाही देखिएको छ । सडक डिभिजन कार्यालय नेपालगन्जले पटक–पटक म्याद थप हुँदा समेत काम सम्पन्न नगरेपछि अन्तिम पटकका लागि भन्दै हर्जाना तिराएर चैत शुरूदेखि निर्माण कम्पनीलाई सडक निर्माणको अनुमति दिएको थियो ।
दैनिक हर्जाना लगाएर काम शुरू गराउँदा पनि निर्माण कम्पनीले सडक निर्माणका लागि बारम्बार आलटाल गरेपछि ठेक्का सम्झौता तोड्ने प्रक्रिया शुरू गरिएको शाक्यले बताए ।काम सन्तोषजनकरूपमा अघि नबढेपछि पछिल्लो समय पेश्कीस्वरूप उपलब्ध गराइएको रकम समेत बैंकबाट फिर्ता ल्याइएको उनको भनाइ छ ।
बाँकेको खजुरा बजारमा १ हजार ८०० मिटर र बर्दियाको गुलरियामा २ हजार २०० मिटर लम्बाइको सडक निर्माणका लागि २१ करोड ४९ लाख रुपैयाँमा सम्झौता भएको थियो । निर्माण कम्पनीले निर्माणकार्यमा ढिलाइ गर्दा यात्रुलाई सास्ती भएकाले ठेक्का तोड्नका लागि प्रक्रिया अघि बढाइएको शाक्यले बताए ।
सडक निर्माण अलपत्र पारेपछि खजुरा गाउँपालिकाका अध्यक्ष डम्बर विकले सडक डिभिजन कार्यालयलाई ठेक्का सम्झौता तोड्न आग्रह गरेका थिए । सडक निर्माणका लागि पटक–पटक ताकेता गर्दा पनि काम शुरू नभएपछि सरोकारवाला निकाय सडक डिभिजनलाई ठेक्का सम्झौता तोडेर अन्य प्रक्रियाबाट सडक निर्माणका लागि पहल गरिदिन आग्रह गरिएको अध्यक्ष विकले बताए ।
