काठमाडौं । सरकारको नीति तथा कार्यक्रममा ‘जनयुद्ध’ शब्द राखेकामा नेकपा एमालेका सचिव योगेश भट्टराईले आपत्ति जनाएपछि माओवादी केन्द्रका सांसद देवेन्द्र पौडेलले संसदबाटै त्यसको जवाफ दिएका छन् ।
आगामी आर्थिक वर्षको नीति तथा कार्यक्रममा ‘जनयुद्ध’ शब्द राखिएकोमा भट्टराईले आपत्ति जनाएपछि सांसद पौडेलले त्यसको जवाफ दिएका हुन् ।
भट्टराईले नीति तथा कार्यक्रमको पहिलो बुँदामा जनयुद्ध शब्द राखिएको भन्दै आपत्ति जनाएका थिए । त्यसको जवाफ दिँद पौडेलले शब्दकोष हेर्न सुझाव दिएका छन् ।
पौडेलले भने, ‘माननीयजीलाई एक पटक डिक्सनरी पल्टाएर हेर्न अनुरोध गर्दछु । त्यो माछा युद्ध थियो, भालु युद्ध थियो ? जंगलका अर्नाहरु लडेका थिए कि रुख, ढुंगाहरु लडेका थिए ? मानिसले लडेको युद्धलाई कि जनआन्दोलन भनिन्छ कि जनयुद्ध भनिन्छ । यो मानिसका छोराहरु लडेका युद्ध थियो ।’
शुक्रबार संघीय संसदको दुवै सदनमा राष्ट्रपति रामचन्द्र पौडेलले आगामी आर्थिक वर्षको नीति तथा कार्यक्रम प्रस्तुत गरेका थिए । नीति तथा कार्यक्रमको पहिलो बुँदामा जनयुद्ध शब्द राखिएको छ ।
