भारतका कुख्यात अपराधी एवम् पूर्वसांसद अतिक अहमदको प्रहरी हिरासतमा हत्या भएको छ । भारत उत्तर प्रदेशको प्रयागराजमा प्रहरी संरक्षणमै उनी र उनका भाई अशरफको गोली हानी हत्या भएको हो ।
स्वास्थ्य परीक्षणका लागि अस्पताल लगिएका बेला सञ्चारकर्मीले उनहरुसँग संवादको प्रयास गरिरहेका बेला उनीमाथि गोली प्रहार भएको हो ।
हत्या गरिएको घटना टेलिभिजन च्यानलले खिचेका भिडियोमा समेत रेकर्ड भएको जनाइएको छ । भिडियोमा अतिक र अशरफलाई हत्कडी लगाइएको देखिएको छ ।
पत्रकारको भेषमा आएका बन्दुकधारीले उनीहरुमाथि गोली चलाएका हुन् । गोली हानेपछि बन्दुकधारीलाई प्रहरीसमक्ष आत्मसमर्पण गरेका थिए । घटनामा संलग्नलाई प्रहरीले नियन्त्रणमा लिएको भारतीय सञ्चारमाध्यमले जनाएका छन् ।
केही समयअघि अतिकका छोरा पनि प्रहरीको मुढभेडमा मारिएका थिए । अतिकमाथि विगत दुई दशकयता हत्या, अपहरण, जबरजस्ती चन्दा असुलीजस्ता अभियोग छ ।
यसअघि अतिकले आफ्नो ज्यानमाथि खतरा रहेको बताएका थिए । घटनापछि उत्तर प्रदेशका मुख्यमन्त्री योगी आदित्यनाथले न्यायिक छानबिनको निर्देशन दिएका छन् ।
