बैठकमा दुवै पक्षले नेपाल–बेलायत सम्बन्धको समग्र अवस्थाको समीक्षा गर्नुका साथै पारस्परिक हितका विभिन्न क्षेत्रमा संलग्नता बढाउने विषयमा छलफल भएको लन्डनस्थित नेपाली दूतावासले जनाएको छ ।
दुवै प्रतिनिधिमण्डलले दुई शताब्दी पुरानो मित्रता र सहयोगका बारेमा विचार आदानप्रदान गर्नुका साथै विकास सहयोग र प्राथमिकता, व्यापार, लगानी र पर्यटन, शिक्षा र मानव संशोधन विकास, कन्सुलरलगायत द्विपक्षीय सम्बन्धका प्रमुख पक्षमा भएका प्रगतिको समीक्षा गरेका थिए ।
जनस्तरको सम्बन्ध, ब्रिटिस गोर्खाको मुद्दा, जलवायु परिवर्तन र दिगो विकासका साथै बहुपक्षीय मञ्चमा पारस्परिक हितका मुद्दामा मिलेर काम गर्ने विषयमासमेत बैठकमा छलफल भएको थियो ।
बैठकले भूतपूर्व गोर्खाका विषयमा भइरहेको वार्ताको समीक्षा गर्दै गुनासो सम्बोधनका लागि छलफल जारी राख्ने सहमति गरेको छ ।
बेलायती पक्षले बेलायतको विकास सहयोग पोर्टफोलियोको बदलिँदो स्वरूपका बारेमा प्रकाश पार्दै नेपाललाई भविष्यमा हुने सहयोगका प्राथमिकताका क्षेत्र आदानप्रदान गरेको थियो ।
यसमा मध्यम आय भएको मुलुकलाई सङ्क्रमणकालीन अवस्थामा प्रदान गरिने सहयोग, दिगो विकास लक्ष्यतर्फ प्रगति, लगानी र जलवायु वित्त परिचालनमा सहयोग, शिक्षामा पहुँच, विशेष गरी बालिकाको शिक्षा विस्तारमा सहयोग समावेश छ ।
नेपाली पक्षले सबैभन्दा ठुलो विकास साझेदारका रूपमा बेलायतले प्रदान गर्दै आएका बहुमूल्य विकास सहयोगको प्रशंसा गर्दै अति कम विकसित मुलुकको हैसियतबाट स्तरोन्नति हुने महत्त्वपूर्ण समयमा त्यस्तो सहयोगको निरन्तरता र अभिवृद्धिको आवश्यकतामा जोड दिइएको थियो ।
व्यापार, लगानी, ऊर्जा र पर्यटन जस्ता उत्पादनशील क्षेत्रमा सहयोग र संलग्नतालाई थप सुदृढ र फराकिलो बनाउन दुवै पक्ष सहमत भएकाे छ । नेपालको स्वच्छ ऊर्जामा लगानी बढाउनुले आर्थिक वृद्धि मात्र नभई जलवायु परिवर्तनको मुद्दालाई सम्बोधन गर्न सहयोग पुग्ने सहमति भएको छ ।
दुवै पक्षले नवीकरणीय ऊर्जा र सूचना तथा सञ्चार क्षेत्रलगायत विभिन्न क्षेत्रमा ब्रिटिस इन्टरनेशनल इन्भेष्टमेन्ट जस्ता लगानीका निकायको उपयोगका साथै ब्रिटिस लगानी साझेदारीबाट थप स्रोत प्रयोग गर्ने सम्भावनाबारे पनि छलफल गरेका थिए ।
दुवै पक्षले जलवायु परिवर्तन, गरिबी निवारण र दिगो विकासका एजेन्डालाई अगाडि बढाउनेजस्ता बहुपक्षीय मञ्चमा साझा हितका विभिन्न विषयमा सहकार्य गर्ने विषयमा नवीकरण गरेका छन् ।
संयुक्त अधिराज्यले संयुक्त राष्ट्रसङ्घको शान्ति स्थापनामा हालको दोस्रो ठुलो सेना उपलब्ध गराउने राष्ट्रको रूपमा नेपालको योगदानको प्रशंसा गरेको छ ।
छुट्टाछुट्टै भेटमा नेपालका परराष्ट्र सचिव भरतराज पौड्याल र बेलायतको राष्ट्र मण्डल विकास कार्यालयका स्थायी उपसचिव सर फिलिप बार्टनबीच मैत्री सन्धिको शतवार्षिकी मनाउने, उच्चस्तरीय भ्रमण आदानप्रदान, द्विपक्षीय सहयोगलगायत विविध विषयमा फलदायी छलफल भएको दूतावासले जनाएको छ ।
