काठमाडौं । अख्तियार दुरूपयोग अनुसन्धान आयोगले अनावश्यक सफ्टवेयर खरिदगरी भ्रष्टाचार गरेको आरोपमा बाराको सिम्रौनगढ नगरपालिकाका तत्कालीन प्रमुख प्रशासकीय अधिकृतसहित तीनजनाविरूद्ध भ्रष्टाचार मुद्दा दायर गरेको छ ।
आयोगले बुधबार तत्कालीन प्रमुख अधिकृत विश्वराज मरासेनी, लेखा अधिकृत सर्मेन्द्र प्रसाद चौधरी र जिन्सी शाखा प्रमुख सुरेशप्रसाद यादवविरुद्ध विशेष अदालतमा भ्रष्टाचार मुद्दा दायर भएको हो ।
नगरपालिकाको जिन्सी व्यवस्थापनको केन्द्रीय प्रणालीसमेतको सप्टवेयर खरिद तथा जडान/विस्तार गर्ने कार्यका लागि टिप्पणी पेश तथा सप्टवेयर खरिद कार्यको स्वीकृति गरी १ लाख ९९ हजार ८९७ रुपैयाँ भुक्तानी गरी सफ्टवेयर खरिद गरेको तर प्रयोग नगरेको पाइएकाले उनीहरूविरुद्ध भ्रष्टाचार मुद्दा दायर गरेको अख्तियारका प्रवक्ता भोला दाहालले जानकारी दिए ।
सफ्टवेयर खरिदमा भ्रष्टाचार गरेको भन्ने उजुरीका आधारमा अनुसन्धान गर्दा सरकारी सम्पत्ती बदनियतपूर्वक हानिनोक्सानी गरेको पाइएको अख्तियारको ठहर छ । उनीहरूमाथि १ लाख ९९ हाजर ८९७ रुपैयाँ कसूर बिगो कायम गरी भ्रष्टाचार निवारण ऐन २०५९ को दफा ८ को उपदफा (३) बमोजिम सजायको मागदावीसहित आरोप पत्र दायर भएको हो।
