लुम्बिनी । लुम्बिनी प्रदेशका मुख्यमन्त्री लीला गिरीले सञ्चार र सीमान्तकृत समुदायको सशक्तिकरणका लागि सञ्चालित कार्यक्रम लक्षित समुदायमा पुग्नुपर्ने बताएका छन् ।
युएसएड नागरिक समाज र सञ्चार (सीएसएम) कार्यक्रमको आज बुटवलमा आयोजित शुभारम्भ कार्यक्रममा उनले जुन समुदायका लागि लक्षित गरी कार्यक्रम सञ्चालन निर्माण गरिएको हो त्यो कार्यक्रम पारदर्शिता र जवाफदेहितामा कतै नचुकोस् भनेर आग्रह गरे ।
उनले भने, ‘सञ्चार माध्यममार्फत आवाजविहीनको आवाज सदनसम्म पुर्याउन र सरकारी नीति तथा कार्यक्रममा उनीहरुको आवश्यकता समेटेर समग्रमा उनीहरुको जीवनस्तर फेर्न कार्यक्रम सहयोगी बनोस् ।’
युएसएड नेपालका प्रमुख सेपिदे केभिएन्शादले सरकार, नागरिक समाज, मिडिया र सीमान्तकृत समुदाय, युवा तथा महिलाको भूमिका स्थानीय मुद्दाको समाधानमा अत्यन्तै महत्वपूर्ण हुने बताए । उनले बृहत्तर एवं विविधतापूर्ण नागरिक सहभागिताका आधारमा स्थानीय मुद्दा सम्बोधन गर्नु स्वतन्त्र र खुला समाजको चिनारी भएको जनाउँदै नेपालको लोकतन्त्रलाई बलियो बनाउने दिशामा नेपालसँगको साझेदारीलाई कार्यक्रममार्फत निरन्तरता दिने प्रयास गरिएको बताए ।
कार्यक्रममा द एसिया फाउन्डेसनका नेपाल प्रतिनिधि मेगन नाल्बोले समुदायमाझ सक्रिय आत्मनिर्भर एवं उत्थानशील स्थानीय सङ्घसंस्था र स्थानीय सरकारसँग कार्यक्रममार्फत सहकार्य गर्दै स्थानीय समस्या समाधानका प्रयास गरिने बताए ।
उनले आगामी वर्षमा आर्थिक सहायता, नेतृत्व विकास र लुम्बिनी प्रदेशका बासिन्दाले भोगिरहेका समस्याको उपयुक्त समाधान पहिल्याउन कार्यक्रममार्फत साझेदारी गर्ने र स्थानीय समुदायको पहुँच बढ्ने विश्वास व्यक्त गरे ।
युएसएडको सहयोगमा सन् २०१६ देखि सन् २०२२ सम्म सञ्चालित ‘नागरिक समाज ः पारस्परिक जवाफदेहिता कार्यक्रम ९सीएसम्याप०’को सिकाइ एवं नागरिक समाज र मिडिया साझेदारसँगको छलफलका आधारमा सीएसएम कार्यक्रम ९सन् २०२२–२०२७०को प्रारूप तयार गरिएको युएसएड नागरिक समाज र सञ्चार कार्यक्रम लुम्बिनी प्रदेश व्यवस्थापक लक्ष्मीकुमारी नेपाली श्रेष्ठले बताइन् ।
द एसिया फाउन्डेसनमार्फत कार्यान्वयन हुने सीएसएम कार्यक्रम मुख्यतः लुम्बिनी र मधेस प्रदेशमा केन्द्रित हुने जनाइएको छ । साढे १८ मिलियन अमेरिकी डलर सहयोगमा पाँच वर्षसम्म चल्ने कार्यक्रमले पारदर्शी, जवाफदेही तथा जिम्मेवार नागरिक समाज र मिडियाका माध्यमद्वारा समावेशी विकास गर्ने नेपाल सरकारको प्रतिबद्धतालाई सहयोग पुर्याउने कार्यक्रमको मुख्य उद्देश्य रहेको छ ।
सीएसएम कार्यक्रमले महिला, युवा र सीमान्तकृत समुदायको विकासका लागि तिनकै नेतृत्वमा सञ्चालित स्थानीय नागरिक समाज र मिडियाको सबलीकरणलाई सहयोग गर्नेछ । कार्यक्रमले स्थानीय समुदायको आवाजलाई मुखरित गर्ने र विकास प्रयासमा देखा परेका विभिन्न चुनौतीको सम्बोधनका निम्ति स्थानीय सङ्घसंस्थालाई आर्थिक सहयोगको अवसर उपलब्ध गराउने उद्देश्य लिएको छ । समुदायमा देखापरेका चुनौतीको सम्बोधनका लागि समुदायकै अग्रसरतामा समाधान पहिल्याउने स्थानीय क्षमताको अभिवृद्धि गर्नु सीएसएम कार्यक्रमको प्राथमिकता रहेको कार्यक्रम व्यवस्थापक श्रेष्ठले बताइन् ।
