सिन्धुपाल्चोक । संघीय राजधानी पूर्वका जिल्लामा लामो समयदेखि यातयात सञ्चालन गर्दै आइरहेको पूर्व अरनिको यातयात कम्पनीले दुर्घटना न्यूनीकरण गर्न नियमितरूपमा यातयात मजदुरलाई प्रशिक्षण दिन सुरुआत गरेको छ ।
चालकहरूको लापरवाहीले दैनिकरूपमा सडक दुर्घटना हुन थालेपछि पूर्व अरनिको यातयात कम्पनीमाफर्त कार्यरत चालक, सहचालक तथा परिचरका लागि मासिकरूपमा अभिमुखीकरण तालिम सञ्चालन गरेको हो । यातयातले प्रत्येक महिनाको २३ गते मजदुरलाई ट्राफिक नियम, यात्रुसँग गरिने व्यावहार, यातयातसम्बन्धी नियम, कानुनलगायतका विषयमा प्रशिक्षण दिन सुरु गरेको पूर्व अरनिको यातयात कम्पनी प्रालिका अध्यक्ष केदार खत्री क्षेत्रीले जानकारी दिए ।
प्रशिक्षणमा न्यूतम एक सय बढी मजदुर तालिममा सहभागी हुने गरेको र अहिले दुर्घटनामा समेत कमी हुँदै गएको उनले बताए । यातयात क्षेत्रका विज्ञ, ट्राफिक प्रहरी, नेपाल प्रहरी, सरकारी वकिललगायतका यायतायतसँग सरोकारवाला विज्ञहरू ल्याएर मजदुरलाई प्रशिक्षण दिने गरिइएको छ । अध्यक्ष क्षेत्री आफैले यातायात मजदुरलाई यात्रुसँग कसरी राम्रो व्यवहार गर्ने र दुर्घटना न्यूनीकरण कसरी कमी गर्ने भनेर प्रशिक्षण प्रशिक्षण दिँदै आएका छन् ।
पूर्व अरनिको यातयात सञ्चालन हुने जिल्लामा छुट्ने बसहरूको ‘काउन्टर’ मा प्रत्येक दिन बिहान पुगेर बसका चालक, सहचालकसँग भेटघाट गरेर यात्रुप्रति जिम्मेवार भएर प्रस्तुत हुन सबैलाई आग्रह गर्दै काउन्टरमा जाने गरेको अध्यक्ष क्षेत्रीले बताए ।
‘हामी अब कोर्ष नै बनाएर मजदुरलाई प्रशिक्षण दिने योजनामा छौँ’, उनले भने, ‘कोर्ष निर्माण गरेर सिकायौँ भने सबै मजदुरका लागि राम्रो हुन्छ ।’ राजधानीपूर्वका काभ्रे, सिन्धुपाल्चोक, दोलखा, रामेछाप, सिन्धुली, ओखलढुङ्गालगायत १६ बढी जिल्लामा अरनिकोले विगत ५० वर्षदेखि नियमित यातयात सञ्चालन गर्दै आइरहेको छ ।
अहिले अन्य जिल्लामा समेत यातयात सञ्चालनका लागि दैनिकरूपमा त्यस क्षेत्रका जनप्रतिनिधिले आग्रह गर्दै पत्र आउने गरेको र आफूहरू अन्य जिल्लामा समेत यातयात सेवा विस्तारका लागि सकारात्मक रहेको पूर्व अरनिको यातयात प्रालिका सचिव प्रभुराम थापाले बताए ।
