पाँचथर । पाँचथरको फिदिम–११ चम्पेटारमा पिअप दुर्घटना हुँदा एक जनाको ज्यान गएको छ । फालेलुङ–८ लुवाफुबाट सदरमुकाम फिदिमका लागि छुटेको मे १ ज २९५८ नम्बरको पिअप जीप आज बिहान दुर्घटनामा परेको हो । दुर्घटनामा पाँचथरको फालेलुङ गाउँपालिका–८ का ३० वर्षीय साजन केरुङको घटनास्थलमै ज्यान गएको जिल्ला प्रहरी कार्यालय पाँचथरले जनाएको छ ।
दुर्घटनामा चालक छविअधिकारीसहित नौं जना घाइते भएका छन् । घाइतेमध्ये दुई जनाको अवस्था गम्भीर रहेको छ । घाइते तीन जनालाई उपचारका लागि झापा रेफर गरिएको पाँचथरका प्रहरी प्रमुख हरि खतिवडाले जानकारी दिए । घाइते ६ जनाको पाँचथर अस्पतालमा उपचार भइरहेको छ । दुर्घटनाको कारण खुल्न नसकेको प्रहरीले जनाएको छ ।
