काठमाडौँ- फ्रान्सको प्रसिद्ध फुटबल क्लब पेरिस सेन्ट जर्मेन पिएसजी र मोरक्कोका डिफेन्डर अशरफ हकिमीमाथि बलात्कारको आरोप लगाइएको फ्रान्सेली अभियोजनकर्ताले शुक्रबार बताएका छन् ।
हकिमीलाई २४ वर्षीया एक युवतीले लगाएको आरोपका सम्बन्धमा बिहीबार अभियोजकहरूले सोधपुछ गरेका थिए ।
उनी गत वर्ष कतारमा भएको विश्वकपको सेमिफाइनलमा मोरक्कोको ऐतिहासिक यात्राको महत्वपूर्ण खेलाडी रहेका थिए । उनले लामो समय स्पेनको रियल मड्रिडबाट पनि फुटबल खेलेका छन् ।
हकिमी शुक्रबार बिहान पिएसजीको प्रशिक्षणमा देखिएका थिए । एएफपीसँगको सम्पर्कमा क्लबले उनीविरूद्धको आरोपबारे कुनै प्रतिक्रिया दिएको छैन ।
हकीमीलाई आफ्नी श्रीमती र छोराछोरी छुट्टीमा टाढा रहेको बेला आफ्नो घर आउनका लागि ती युवतीलाई पैसा तिरेको आरोप लगाइएको छ ।
गत सोमबार हकिमी फ्रान्सको राजधानी पेरिसमा आयोजित फिफा बेस्ट अवार्ड समारोहमा देखा परेका थिए । उनलाई व्यवसायिक फुटबलरको लागि विश्वव्यापी प्रतिनिधि संगठन एफआईएफप्रो पुरुष वर्ष खेलाडीको रूपमा सम्मान गरिएको थियो ।
कतारमा सम्पन्न विश्वकप फुटबलमा उनी मोरक्काको फुटबल टोलीको महत्वपूर्ण खेलाडीका रूपमा देखिएका थिए । मोरक्को अरब संसारबाट विश्वकपको अन्तिम चारमा पुग्ने पहिलो राष्ट्र बनेको थियो ।
फ्रान्सको कानूनअनुसार अभियोग लाग्नुको अर्थ मुद्दा सुनुवाइमा जाने भन्ने छैन ।
