बुटवल । सुदूरपश्चिम-११ तिलोत्तमा गोल्डकपको फाइनलमा पुगेको छ । बुधबार भएको पहिलो सेमिफाइनल खेलमा थ्री स्टार क्लवलाई १—० गोलअन्तरले पराजित गर्दै सुदूरपश्चिम ११ उपाधि नजिक पुगेको हो ।
खेलको ८६ औँ मिनेटमा सुदूरपश्चिम ११ का फागुराम थारुले गोल गरेका थिए । उनको सो गोल निर्णायक बन्यो । बिहीबार मनाङ मर्स्याङदी र फ्रेण्डस क्लबबीच दोस्रो सेमिफाइल खेल हुनेछ । सुदूरपश्चिम ११ ले यी दुईबीचको विजेतासँग शनिबार फाइनल खेल्नेछ ।
रुपन्देही जिल्ला फुटबल संघको आयोजनामा एन्फा टेक्निकल सेन्टर देवीनगरमा चलिरहेको तिलोत्तमा गोल्डकपमा दुई विभागीयसहित ८ टिम सहभागी भएको प्रतियोगिताको विजेताले ११ लाख ११ हजार एक सय ११ रुपैयाँ नगद पुरस्कार पाउने संघले जनाएको छ ।
गोल्डकपको उपविजेताले ५ लाख ५५ हजार ५ सय ५५ रुपैयाँ पुरस्कार प्राप्त गर्नेछ । सर्वोत्कृष्ट खेलाडीले एक लाख रुपैयाँ वा एक थान मोटरसाइकल पुरस्कार पाउँदा उत्कृष्ट फरवार्ड, गोलरक्षक, मिड फिल्डर, डिफेन्स र कोचले जनही ३० हजारका दरले नगद पुरस्कार प्राप्त गर्ने जनाइएको छ ।
