काठमाडौँ । निवर्तमान उपराष्ट्रपति नन्दबहादुर पुनको बिदाइ भएको छ । नव निर्वाचित उपराष्ट्रपति रामसहाय यादवको शपथ ग्रहण कार्यक्रमसँगै निवर्तमान उपराष्ट्रपति पुनको बिदाइ गरिएको हो ।
उपराष्ट्रपति यादवको शपथ समारोहमा निवर्तमान उपराष्ट्रपति पुनलाई प्रधानमन्त्री पुष्पकमल दाहाल ‘प्रचण्ड’ ले काठको आँखीझ्याल दिएर बिदाइ गरेका हुन् । निवर्तमान राष्ट्रपति विद्यादेवी भण्डारीलाई पनि आँखीझ्याल नै दिएर बिदाइ गरिएको थियो ।
निवर्तमान उपराष्ट्रपति नन्दबहादुर पुनले उपराष्ट्रपति पदमा निर्वाचित उपराष्ट्रपति रामसहाय प्रसाद यादवलाई बधाई दिँदै कार्यकाल सफलताको शुभकामना व्यक्त गरेका छन् । आफ्नो कार्यकाल टुंगिँदै गर्दा पुनले आफ्नो कार्यकाल सफल र सुखद बनाउन सहयोग गर्ने सबैलाई धन्यवाद समेत व्यक्त गरेका हुन् । उनले आगामी दिनमा देशको राष्ट्रियता, भौगोलिक अखण्डता, सार्वभौमिकता र समृद्धिका लागि निरन्तर लागिरहने प्रतिबद्धता जनाएका छन् ।
