अमेरिकाले आफ्नो आकाशमा देखिएको बलुन लडाकू विमान प्रयोग गरी खसालेको छ । टेलिभिजनहरुमा देखाइएका भिडियोमा उक्त बलुन सानो विस्फोटनपछि समुद्रमा खसेको देखिएको छ ।
एउटा क्षेप्यास्त्रको सहाराले आकाशमा रहेको उक्त बलुन विरुद्ध एफ २२ लडाकु जेटले कारबाही अघि बढाएको थियो । रक्षा अधिकारीहरूले अमेरिकि सञ्चारमाध्यमलाई त्यसको भग्नावशेष मटल बीच, साउथ क्यारोलाइना नजिकै ४७ फिट गहिरो पानीमा खसेको जनाएका छन् ।
निशाना लगाइए लगत्तै त्यो सिधै समुद्रमा खसेको थियो र अमेरिकी अधिकारीहरूले झन्डै ११ किलोमिटरको क्षेत्रफलमा फैलिएको त्यसको भग्नावशेष खोज्ने प्रयास गरिरहेको जनाइएका छन् । भग्नावशेष सङ्कलनका लागि दुई वटा नौसैनिक पानी जहाज र एउटा क्रेन परिचालन गरिएको छ ।
साउथ क्यारोलाइनाका अधिकारीहरूले यसअघि मानिसहरूलाई आफ्नै राइफल प्रयोग गरी उक्त बलुनलाई खसाल्ने प्रयास नगर्न अनुरोध गरेका थिए । उक्त बलुन संवेदनशील क्षेत्रहरूको जासुसी गर्न प्रयोग गरिएको पेन्टागनको विश्वास छ ।
खासै गहिरो नरहेकाले उक्त कारबाहीका लागि लामो समय नलाग्ने उनीहरूले अपेक्षा गरेका छन् । राष्ट्रपति बाइडनले लडाकु पाइलटहरूलाई सफलतापूर्वक बलुनलाई खसालिदिएकोमा बधाई दिएका छन् । उनले बुधवार नै उक्त आदेश दिएका थिए।
तर पेन्टागनले जमिनमा रहेका मानिसहरूलाई अनावश्यक खतरामा नपार्ने भन्दै उक्त बलुन पानीमाथि नपुगुन्जेलसम्म कुर्ने निर्णय लिएको थियो । बेइजिङले उक्त बलुन गैरसैनिक मौसम अनुगमन उपकरण भएको र बाटो बिराएर त्यहाँ पुगेको जनाएको थियो ।
त्यसरी अमेरिकाले बल प्रयोग गरेकोमा चीनले आक्रोश व्यक्त गर्दै गम्भीर असन्तुष्टि र विरोध जनाएको छ । चिनियाँ पक्षले निरन्तर अमेरिकी पक्षलाई उक्त बलुन गैरसैनिक प्रयोजनका लागि भएको र त्यो बाटो बिराएर त्यहाँ पुगेको बताएको थियो ।
