खोटाङ । साकेला गाउँपालिकामा पालिकास्तरीय पाँचौँ अन्तरमाध्यमिक विद्यालय राष्ट्रपति रनिङ शिल्ड प्रतियोगिता सुरु भएको छ । त्रिहत्तरौँ प्रजातन्त्र दिवसका अवसरमा आयोजना गरिएको उक्त प्रतियोगिता वडा नं ४ मात्तिमस्थित नौलाखर्क खेलमैदानमा सुरु भएको हो ।
गाउँपालिकाका अध्यक्ष रविप्रकाश राईले प्रतियोगिता शुभारम्भ गर्दै आफ्नो क्षेत्रभित्र विकासका आयोजनालाई समयभित्रै सक्न र गुणस्तरीय बनाउन पटक-पटक खबरदारी गरिरहेको बताए । ‘खेलकुद क्षेत्रलाई व्यावसायिकरूपमा अघि बढाउन गाउँपालिकाले यस प्रतियोगितालगायत विभिन्न कार्यक्रम गर्दै आएको छ’, उनले भने, ‘छनोट भएका खेलाडीलाई जिल्लास्तरमा हुने खेलमा सहभागी हुन पठाइने छ ।’
प्रतियोगितामा विभिन्न छवटा विधाका ५४ पदकका लागि विद्यार्थीले प्रतिस्पर्धा गर्ने भएका छन् । प्रतियोगितामा भलिबल, हाईजम्प, लङजम्प, सटफुट, रिले दौड १०० मिटर, २०० मिटर, ४०० मिटर र ८०० मिटरलगायत प्रतियोगितामा छात्रछात्रा छात्र तथा छात्राको सहभागिता भएको जनाइएको थियो ।
प्रतियोगितामा १८ वटा इभेन्टमा स्वर्ण, रजत र कास्य पदकका लागि प्रतिस्पर्धा हुने र सबै विद्यामा विजेता विद्यालयलाई रनिङ शिल्ड दिइने भएको छ । प्रतियोगिता सञ्चालन गर्न संघीय खेलकुद मन्त्रालयले रु एक लाख उपलब्ध गराएकामा नपुग रकम गाउँपालिकाले उपलब्ध गराएको थियो। गाउँपालिकाले प्रतियोगितास्थल आउन-जान तथा अन्य व्यवस्थापन खर्चका लागि दूरीका हिसाबले प्रत्येक विद्यालयलाई रु ३० हजारसम्म उपलब्ध गराएको थियो ।
