काठमाडौँ । नेकपा माओवादी केन्द्रले राष्ट्रपति निर्वाचनमा राष्ट्रिय सहमति खोज्ने निर्णय गरेको छ । सोमबार बसेको पदाधिकारी बैठकले २५ फागुनमा हुने राष्ट्रपति निर्वाचनमा राष्ट्रिय सहमति खोज्ने गरेको हो ।
पार्टी प्रवक्ता कृष्णबहादुर महराले बैठकमा राष्ट्रपतिमा राष्ट्रिय सहमति हुनुपर्ने बारे छलफल भएको तर व्यक्तिका बारे चर्चा नभएको बताए ।
बैठकपछि पत्रकारहरूसँग कुरा गर्दै प्रवक्ता महराले पार्टीको हितलाई ध्यानमा राखेर राष्ट्रपति चयनबारे अन्य दलहरूसँग छलफल अगाडि बढाइने बताए । राष्ट्रिय सहमतिमै राष्ट्रपति चयन हुनुपर्छ भन्ने अडानमा आफूहरू कायम रहेको उनको भनाइ छ ।
त्यस्तै राष्ट्रपति निर्वाचनबारे पार्टीको निर्णय गर्ने अधिकार अध्यक्ष प्रचण्डलाई दिएको छ ।
