काठमाडौँ । अखिल नेपाल महिला सङ्घको सातौँ राष्ट्रिय सम्मेलन आगामी चैत २५ र २६ गते हुने भएको छ ।
सम्मेलन आयोजक कमिटीको मंगलबार बसेको तयारी बैठकमा उक्त समयमा सम्मेलन गर्ने र सम्मेलनको व्यवस्थापन बागमती प्रदेश कमिटीले गर्ने निर्णय गरिएको छ । नेकपा (एमाले) का स्थायी समिति सदस्य सीता पौडेलले राज्यको प्रत्येक निकायमा महिला सहभागिता वृद्धि गर्नका लागि महिला एकताबद्ध भएर सक्रिय रहनुपर्ने बताइन् । उनले सङ्गठनको ऐतिहासिक भूमिका र यसवाट प्राप्त उपलब्धिको रक्षा गर्न महिला राजनीतिकरुपमा अगाडि बढेको र अझ बढी क्रियाशील भएर लाग्नुपर्नेमा जोड दिइन् ।
बैठकमा नेतृहरुले वडादेखि राष्ट्र प्रमुखसम्म नेतृत्व गरिरहेको र संसदीय फाँटमा समेत एक तिहाइ महिलाको प्रतिनिधित्व भएको उल्लेख गर्दै आमाको नाममा नागरिकता, हरेक क्षेत्रमा कम्तीमा एकतिहाइ महिलाको प्रतिनिधित्वलगायत अधिकार प्राप्त भइरहेका कुरा उठेको थियो ।
सम्मेलन आयोजक कमिटीका संयोजक थममाया थापाको अध्यक्षतामा बसेको बैठकले सम्मेलनबाट महिलाको नेतृत्व विकास गर्न सहयोग पुग्ने विश्वास व्यक्त गर्नुभयो । सम्मेलन सम्पन्न गर्नका लागि विभिन्न १९ उपसमिति गठन गरिएका छन् ।
