सिरहा । तराई मधेसमा चिसो बढ्दै गएपछि चिसोबाट बचाउनका लागि सिरहाको मिर्चैया नगरपालिकाले आज मिर्चैयाको कटारी चोक, थाना चोकसहित विभिन्न स्थानमा दाउरा उपलब्ध गराई आगो ताप्ने व्यवस्था मिलाएको छ ।
आज बिहानदेखि झनै चिसो बढेकाले बाटो हुँदै जाने यात्री, सामान किनमेल गर्न बजार आउनेलाई लक्षित गरी चिसोबाट बचाउने भनी दाउरा वितरण गरेको मिर्चैयाका नगर प्रमुख श्रवण यादवले जानकारी दिए । जिल्लाको मुख्य व्यापारिक केन्द्र लहानमा सशस्त्र प्रहरी बल नेपालले बजारको मुख्य चोक, भीडभाड हुने स्थान लक्षित गरी दाउरा बालेको हो ।
तराई मधेसमा बाक्लो हुस्सु तथा कुहिरोका कारण अत्यधिकरूपमा चिसो बढ्न गएकाले सप्तरीको डाक्नेश्वरी नगरपालिकाले सामुदायिक विद्यालयहरू २०७९ साल पुस २२ गते सम्मका लागि बन्द गरेको शिक्षा अधिकृत कृष्णकुमार यादवले बताए । आज बिहानदेखि सिरहा जिल्लामा बाक्लो हुस्सु लागेको र चिसो बढेकाले बालबालिका, वृद्धवृद्धासहित जिल्लाको जनजीवन प्रभावित भएको छ ।
