काठमाडौंँ। नेकपा एमालेले नवनिर्वाचित सांसदहरुलाई आजदेखि प्रशिक्षण दिने भएको छ । संसदीय विभाग प्रमुख डा. शिवमाया तुम्बाहाङफेका अनुसार आज (शनिबार) दिउँसो १ बजे एमालेका नवनिर्वाचित सांसदहरुलाई प्रशिक्षण दिन लागेको हो । प्रशिक्षण कार्यक्रम संघीय संसद भवनको ल्होत्से हलमा हुने उनले बताइन् ।
एमालेले नेपालमा संसदीय प्रक्रिया तथा कानुन तर्जुमा विषयक अभिमुखीकरण सञ्चालन गर्न लागेको हो । उनका अनुसार पार्टी अध्यक्ष एवम् संसदीय दलका नेता केपी शर्मा ओलीले निर्देशनात्मक प्रशिक्षण एवम् सम्बोधन गर्नेछन् ।
एमालेमा प्रत्यक्ष चुनावबाट ४४ जना र समानुपातिकबाट ३४ जना गरी ७८ जना प्रतिनिधिसभा सदस्य निर्वाचित भएका थिए । एक जना स्वतन्त्र सांसद एमालेमा प्रवेश गरेपछि ७९ जना पुगेका छन् ।
