दक्षिण कोरियाले युद्धसँग सम्बन्धित आफ्नो खानीलाई युनेस्कोको सम्पदा सूचीमा समावेश गर्न जापानले पटक–पटक गरेको प्रयासको विरोध गर्दै सियोल र टोकियोबीचको लामो कूटनीतिक विवादलाई नवीकरण गरेको छ ।
दक्षिण कोरियाको विदेश मन्त्रालयले एक विज्ञप्ति जारी गर्दै जापान सरकारले युनेस्कोको विश्व सम्पदा सूचीमा ‘साडो आइल्याण्ड गोल्ड माइन्स’ को नामाङ्कन पुनः पेस गरेकोमा खेद व्यक्त गरेको छ ।
जापानले सन् २०१५ मा जापानको मेइजी औद्योगिक आन्दोलनस्थलको शिलालेखसँग सम्बन्धित अनुवर्ती उपायहरू पूर्णरूपमा कार्यान्वयन नगरेको उल्लेख गर्दै कोरियाली मन्त्रालयले साडो खानीको पृष्ठभूमि पनि मेइजीका क्षेत्रहरूको जस्तै रहेको उल्लेख गरेको छ ।
दक्षिण कोरियाली इतिहासकारहरूका अनुसार दोस्रो विश्वयुद्धको क्रममा युद्धसँग सम्बन्धित सामग्रीहरू उत्पादन गर्ने सुविधामा परिणत भएको साडो टापुमा रहेको सुन र चाँदीखानीका लागि जापानले हजारौँ कोरियालीहरूलाई भारी श्रम गर्न बाध्य पारेको थियो । यो खानी सन् १९८९ मा बन्द भएको थियो ।
गत वर्षको फेब्रुअरीमा दिइएको प्रारम्भिक पत्र अधुरो रहेको भन्दै जापान सरकारले विवादास्पद खानीलाई युनेस्कोको सम्पदाको सूचीमा सूचीकृत गर्न बिहीबार पुनः सिफारिस पत्र बुझाएको थियो । प्रारम्भिक पत्रमा जापानले २०औँ शताब्दीको युद्धकालको विगतलाई खानीबाट हटाएको बताइएको छ ।
दक्षिण कोरियाली मन्त्रालयले जापानलाई आफूले प्रतिबद्धता जनाएको र विश्व सम्पदा समितिले पटक–पटक गरेका निर्णयलाई यथाशीघ्र कार्यान्वयन गर्न पुनः आग्रह गरेको जनाएको छ ।
दक्षिण कोरियाले युनेस्कोलगायत अन्तर्राष्ट्रिय समुदायसँग मिलेर युद्धकालमा काम गर्न बाध्य पारिएका मानिसहरूको पीडादायी इतिहास समावेश भएको पूर्ण इतिहास प्रतिविम्बित गर्ने काम छिट्टै सुरू गर्ने पनि जनाएको छ ।
