विराटनगर । प्रदेश–१ की उपसभामुख सिर्जना दनुवारले पद तथा गोपनीयताको शपथ ग्रहण गरेकी छिन् । आज (शनिबार) प्रदेश–१ को प्रदेश प्रमुखको कार्यालयमा उपसभामुख दनुवारले प्रदेश–१ का सभामुख बाबुराम गौतमबाट पद तथा गोपनीयताको शपथ ग्रहण गरेकी हुन् ।
शनिबारकै प्रदेशसभा बैठकबाट बहुमतका आधारमा उपसभामुख पदमा दनुवार निर्वाचित भएकी थिइन् । प्रदेशसभा सचिवालयमा भएको उपसभामुख निर्वाचन प्रक्रियामा दनुवारको पक्षमा ५७ मत परेको थियो । मतदानमा ९० जना सांसदहरुको सहभागिता थियो ।
दनुवारको प्रस्तावकमा माओवादी केन्द्रका प्रदेश सांसद नारायण बुर्जा मगर र समर्थकमा राप्रपाकी सबिजा बजगाईँ रहेका थिए । उपसभामुख पदमा नेपाली कांग्रेसकी सांसद लिला कुमारी राईको पक्षमा ३३ मत परेको थियो । प्रदेश सभामा एमालेका ४०, कांग्रेसको २९, नेकपा माओवादी केन्द्रका १३, राप्रपाका ६, नेकपा एकीकृत समाजवादीका ४ र जसपाका १ सदस्य गरी ९३ सदस्य रहेका छन् ।
सत्ता गठबन्धन दल एमाले, माओवादी, राप्रपा र जसपाको गरी ६० मत हुन्छ । उपसभामुखमा निर्वाचित दनुवार उदयपुरबाट समानुपातिक कोटाबाट निर्वाचित सांसद हुन् ।
