सोलुखुम्बु । सोलुखुम्बुमा भरुवा बन्दुक र खुकुरी लिएर धाकधम्की दिँदै गरेको अवस्थामा दुई युवक पक्राउ परेका छन् ।
जिल्लाको माप्य दूधकोसी गाउँपालिका–२ का ३२ वर्षीय खगेन्द्र राई र सोही ठेगानाका २४ वर्षीय प्रवेश राईलाई प्रहरीले पक्राउ गरेको हो । उनीहरूलाई शनिबार साँझ सोलुदूधकुण्ड नगरपालिका–१ बाट एक थान भरुवा बन्दुक र एक थान खुकुरीसहित पक्राउ गरिएको जिल्ला प्रहरी कार्यालय सोलुखुम्बुले जनाएको छ ।
सूचना अधिकारी प्रहरी निरीक्षक रामकिशोर शाहका अनुसार सोलु दूधकुण्ड नगरपालिका–१ छिर्दीस्थित निर्माणाधीन पुलको कामदारहरूलाई धाकधम्की दिँदै गरेको अवस्थामा राईद्वयलाई प्रहरीद्वारा पक्राउ गरिएको हो । उनीहरूलाई जिल्ला प्रहरी कार्यालयको हिरासतमा राखेर अनुसन्धान सुरु गरिएको प्रहरीले जनाएको छ ।
